UPAT na lang sa 22 ka mga barangay sa Digos ang wa natakbuyan og sakit nga dengue human grabe niining gi-atake ang mga barangay sa Tres de Mayo, Zone 1, Zone 2, Zone 3 ug Aplaya.

Ang City Disaster Coordinating Council (CDCC) nihangyo na ni Mayor Joseph Pe¤as nga mopagawas og executive order aron i-deklara nga ubos sa 'state of calamity' ang tibuok dakbayan.

Ni Milagros Sunga, city health officer, nga gikan Enero hangtod sayo ning bulana, 13 na ka mga pasyenteng na-dengue ang namatay subay sa datos sa Provincial Health Office (PHO) ug laing 600 pa ang gi-diagnosed sa maong kagaw.

Sa pagsubay sa Sun. Star Superbalita, gitataw ni Pe¤as, nga iyang gimando ngadto sa city legal officer ang paghimo og draft sa executive order alang sa deklarasyon sa siyudad nga ipailawom sa state of calamity.

"We have to act now, otherwise it will become more severe and tough to address if we do not do anything," matod niya.

Gisaad sab ni Pe¤as nga motabang ang gobyerno sa dakbayan ngadto sa blood bank sa Philippine National Red Cross (PNRC) aron makapalit og makina nga gikinahanglan sa 'extract plasma ug platelet gikan sa mga gidonar nga lab-as nga dugo.

Nasuta nga moadto pa sa siyudad sa Davao ang kabanay sa mga nabiktima sa dengue alang sa maong makina aron masalbar ang ilang pasyente.

Giangkon sa PNRC nga wala sila sa maong himan bisan og mahinungdanon kaayo alang sa mga biktima sa dengue.

"We really don't have this machine, which is a very vital instrument in dealing with dengue fever patients,” ni Helen Caberto, administrador sa PNRC Davao del Sur chapter.

"Perhaps, other local government units, the two congressional districts, and the office of the governor can also give their share to purchase this machine so that the lives of our people will not be endangered due to the advent of dengue fever, which is now affecting our communities," dason ni Peñas.

Niadtong Martes lang, gikanayon ni Dr. Azucena Dayanghirang, Davao del Sur health chief, nga gideklara nilang dengue epidemic ang tibuok probinsiya.

Dason niya nga si Davao del Sur Gov. Douglas Cagas nagdeklara sa tibuok probinsiya nga ilawom sa state of calamity.

Gihimo ni Cagas ang maong lakang aron ang provincial government makagamit sa calamity fund sa pagsumpo sa kagaw.

Gipahugtan na sa PHO ang kampanya batok hugaw'ng palibot aron mabungkag ang mga lugar nga giitlogan sa mga lamok. (Orlando B. Dinoy)