DUHA ka mga lalaki ang gipamusil patay didto sa Barangay Cogon, siyudad sa Digos. Usa sa mga biktima giingong bodyguard sa anak sa kanhi mediaman nga si Nestor Bedolido.

Nahitabo ang insidente atubangan mismo sa Nakayama Technology Corporation, banda alas 10 ang takna, Miyerkules sa gabii.

Giila ni Davao del Sur Provincial Police Director Sr. Supt. Ronald dela Rosa ang mga biktima nga mao sila si Lito Celeste ug Al Edrada Gofredo, pulos hingkod ang pangedaron. Wala gibutyag sa report kon asa sila nagpuyo.

Si Dela Rosa nagkanayon nga gisuwayan pa pagdala ngadto sa Davao del Sur Provincial Hospital ang mga nasamdan apan tungod sa grabeng igo sa nagkadaiyang parte sa lawas, gideklara sila sa mga doktor nga dead on arrival.

Gihulagway sa mga imbestigador nga M16 rifle ang gigamit sa mga kriminal sa pagpatay base sa mga baseyo sa armas nga narekober sa mga pulis didto sa lugar nga nahitabuan sa krimen.

Kapulisan nga nihimo og hot pursuit operation nalutsan pa sa mga suspek sanglit paspas nga nakabiya sa crime scene paingon ngadto sa wa matinong lugar.

Nasayran sa Sun. Star Superbalita nga si Celeste gibutang nga bodyguard sa 21 anyos nga si Marxlen Bedolido, anak ni Nestor kinsa bag-o pa lamang gilubong.

Gikumpirma sab sa batan-ong Bedolido pinaagi sa telepono nga nabalaka na kaayo siya sa nahitabo sanglit posibleng politika gayud hinungdan sa kamatayon sa iyang amahan ug sa gidangatan ni Celeste.

"Wa ko kaila adtong iyang kauban (Celeste) kay kagahapon (Miyerkules) niadto siya sa akoa nangayo og P200 pang-gasolina kay moadto daw sa Matti unya nianang pagka-gabii nakabalo na lang mi nga gipatay na," saysay ni Marxlen sa Superbalita.

Gitataw ni Marxlen nga wa sab siya masayod kinsa ang nagbutang ni Celeste isip iyang bodyguard apan nisalig na lamang siya tungod kay gipakita sa namatay ang tinuod niyang pagserbisyo ngadto kaniya.

"Ilang gipagawas karon nga karnaper daw mao nga gipatay pero di mi motuo kay kabalo mi divertionary tactics na lang na nila," niya pa.

"Karong buntag (Huwebes) moadto unta mi sa pulis kay naa mi pirmahan unya nahitabo na man ni," ni Marxlen kinsa nidason nga di gyud nila i-atras ang kaso bisan unsa pay mahitabo.

"Amoa na gyud gitaguan ang witness kay kabalo mi nga gipangita na sab siya adtong mga nagpatay ni Papa," dason niya.

"Basta karon di na gyud ko mosalig ni bisan kinsa kay grabe na gyud ni nga hitabo," pahayag sa 21 anyos kinsa nabalaka sab sa iyang seguridad.

Apan gibarugan ni Dela Rosa nga ang pagpatay sa duha hayan adunay koneksyon sa ilang trabaho.

"Dili gyud na ma-link sa Bedolido case kay as per intelligence report gun-for-hire to sila unya nagatuyok-tuyok to diri sa Digos kay mangolekta sa mga drug pusher kay aron ingnon nga protector sila, unya gikahadlokan pud to sila aning mga nag-illegal sa Digos," ni Dela Rosa.

"On-going pa ang investigation, tapos according to Digos police maraming involvement yan sa robbery and gun for hire," tataw ni Dela Rosa.

Nagdumili pa hinuon ang kapulisan nga iyagyag ang motibo sa pagpatay sa duha sanglit padayon ang ilang imbestigasyon ingon man pag-ila sa utok sa pagpatay.

Sa kasamtangan gawasnon pa sab ang mga gitudlong suspek sa pagpatay sa kanhi mediaman sanglit matud ni Dela Rosa wa pa niguwa ang orden de aresto gikan sa korte. (Superbalita)