USA ka tawo ang patay, samtang usa sab ang kritikal ang kahimtang human mibangga sa poste sa kuryente ang usa ka motorsiklo didto sa Barangay San Isidro, dakbayan sa Tagum, Martes sa udto.

Ang biktimang nakutloan sa iyang kinabuhi nailhan nga si Rudy Gonzaga, 26, molupyo sa Barangay San Isidro, samtang kritikal ang kahimtang sa iyang angkas nga nailang si Lito Bohol, 18, molupyo sa susamang lugar.

Sa report gikan traffic section sa Tagum City Police Station, nasayran nga pasado alas 12:00 sa udto samtang sakay sa usa ka Honda Wave nga motor ang mga biktima gikan sa Barangay San Isidro padulong sa poblacion nga bahin sa siyudad sa Tagum sa dihang nahitabo ang aksidente.

Samtang ginalawig nila ang Madaum-San Isidro Highway kalit lamang nga nawad-an og kontrol si Gonzaga sa manobela hinungdan nga misarasay ug mibangga sila sa poste sa Davao del Norte Electric Cooperative.

Tungod sa kakusog sa pagkabunal sa mga biktima, nahiagum sila og grabeng mga samad ug bun-og sa nagkadaiyang parte sa kalawasan.

Daling gidala sa ospital ang mga biktima, apan si Gonzaga gideklarang dead on arrival sa mga doktor sa Davao Regional Hospital, samtang si Bohol padayon pang gitambalan.

Nasayran sab nga ang mga biktima wa nagsul-ob og crash helmet hinungdan nga nagrabehan sila.

Kapulisan sa siyudad mihimo na og dugang pakisusi sa hitabo. (Marvin Pineda)