USA ka lalaki ang nakaplagan nga wala nay kinabuhi human naghikog dihang nawad-an na kini og paglaom nga maulian sa iyang gibati.
Giila ang biktima nga mao si Rene Galambao, 21, ulitawo, nanimuyo sa PN Roa Calaanan, Canitoan ning siyudad sa Cagayan de Oro ug katabang sa usa ka pamilya.
Nadiskubre kini sa iyang sakop sa pamilya nga wala nay kinabuhi kagahapon sa kadlawon sulod mismo sa lawak samtang naghikot ug pisi sa iyang liog.
Nagmarka pa ang nylon sa liog niini dihang gitangtang sa mga sakop sa Scene of Crimes Operatives (Soco) nga miresponde uban usab sa kapolisan gikan sa Police Station 7 (PS7) sa Bulua.
Nagbilin pa ang biktima ug suicidal note ug niingon nga mangayo kini og pasaylo sa Ginoo sa iyang gihimo apan gipasabot niini nga dili na gyod niya maagwanta ang gibating kasakit sa iyang tiyan, ang sige ug pangatol sa iyang kalawasan ug ang kasakit sa dughan tungod kay sakit kaayong i-ubo. Dili na usab niya maagwanta ang kanunay madungog nga pagtamay ngadto kaniya hinungdan nga nahimo niini.
Namilin bilin usab kini sa iyang inahan ug igsuon nga kung mahubog ang iyang amahan dili nalang tumpangan ug atimanon ang ilang mga binuhi nga mga mananap.
Ang inahan sa biktima niingon nga naghikog gyod ang iyang anak tungod sa gibati niini. Daw daghan usab kini kapakyasan labina nga 2nd year high school lamang ang natapos niini ug naglaom kining makaeskwela, mianhi denhi sa siyudad ug nanarbaho isip katabang sa usa ka laundry shop.
Kumbinsido ang kapolisan nga walay foul play sa kamatayon sa biktima ug wala na kini gipaubos pa sa otopsiya.
Gikatakadang i-uli sa siyudad sa Gingoog, Misamis Oriental ang patayng lawas sa biktima diin didto namuyo iyang pamilya ug anaa sa dapit iyang amahan nga usa ka mag-uuma.