USA ka tindahan sa palengke sa Pikit, North Cotabato gilabayan og granada alas 4:10 sa hapon niadtong Miyerkules.

Sa taho gikan Cotabato Police Provincial Office nasayran nga kalit lamang mibutho ang usa ka wala mailhing suspek sulod sa Public Market sa Barangay Poblacion, Pikit, diin kalit niining giitsa ang granada sa tindahan nga gipanag-iyahan ni Romeo Carmel.

Sa kalisang, nagkatibulaag sa pagpanagan ang mga tawo sa lugar. Maayo na lamang nga wala makabuto ang maong granada.

Dali sab nga miresponde ang mga miyembro sa Explosive Ordnance Disposal Team sa Philippine Army ug gikuha ang eksplosibo.

Gibutyag ni Chief Inspector Bernard Tayong, hepe sa Pikit PNP nga dali sab nga misibat ang suspetsado paingon sa wala matino nga direksyon human sa hitabo.

Sigun sa tag-iya sa tindahan nga si Carmel nga sa wala pa gilabay og granada ang iyang tindahan may grupo nga nangayo og protection money kaniya.

Sumala pa nga nanghulga pa ang maong grupo nga bombahan ang ilang tindahan kon magmagagi sa paghatag sa ilang gipangayo.

Nagtuo karon ang mga otoridad nga mga miyembro sa Alkhobar Terror Group ang responsable sa hitabo ug padayon sa ilang imbestigasyon. (Edgardo Fuerzas)