DUHA ka sunod-sunod nga engkwentro tali sa Philippine Army ug New People's Army (NPA) nahitabo didto sa Davao del Sur niadtong Martes.

Sa maong engkwentro duha ka mga rebelde ang gituohan nga namatay sigun sa taho sa 39th Infantry Battalion ug 72nd Infantry Battalion ngadto sa 10th Infantry Division.

Base sa report nga gipaguwa ni 10th ID Public Affairs Office chief Captain Emmanuel Garcia, ang unang engkwentro nahitabo dihang gikasugat sa mga sakop 39IB ang kinse ka mga rebelde sa alas 9:00 sa buntag didto sa Sitio Upper Bakoko, Barangay Kapatagan, Digos City.

Mga rebelde giingon nga nahadlok sa militar mao nga dali silang miikyas ug gibilin ang ilang duha ka M16 assault rifle nga nahipus sab dayon sa mga sundalo.

Pipila ka oras ang milabay, alas 2:00 ang takna sa hapon nagkapinusilay na sab ang tropa sa Division Reconnaissance Company ug ang napulo ka mga rebelde didto sa Sitio Mariras, Barangay Sibulan, Sta. Cruz, Davao del Sur.

Mga sundalo nagtuo nga dunay nasamdan ug namatay sa mga rebelde mao nga nagdumili sila sa pagpadayon sa pakigubat sa mga sundalo.

Si Maj. Gen. Carlos Holganza, commander sa 10th ID, nagsulti nga ang sunod-sunod nga engkwentro sa nagpaamatuod nga wala nay kapaingnan ang mga rebelde gawas sa pag-ampo ngadto sa gobyerno.

"This is a proof that the NPAs have nowhere to go but surrender in light of the growing support of the people to our campaign against terrorism," ni Holganza.

Si Holganza subling nanawagan sa mga rebelde nga ibilin ang ilang mga samaron aron ilang mapatambalan sa hospital.

"The wounded NPAs are our fellow Filipinos and our misguided brothers must realize that the government can provide medical attention to them as what we have done to Zaldy Canete, the high ranking NPA leader who surrendered after being wounded last January," pahayag ni Holganza. (AD)