ANG kapulisan nagpahayag nga uyon sila nga magbaton og armas ang mga sakop sa media aron makapanalipod sa ilang kaugalingon batok sa mga tawo nga buot mopatay kanila.

Ang pag-uyon sa mga otoridad giluwatan kagapahon sa buntag atol sa gihimong press briefing sa Davao City Police Office (DCPO) nga gipangulohan ni Police Sr. Supt. Rene Aspera.

Mga sakop sa media gipatawag kagahapon sa DCPO aron hisgotan ang suliran sa media killings sa nasud subay sa gipaguwa nga memorandum Philippine National Police (PNP) national headquarters Directorate for Police Community Relations.

Ang memorandum miguwa human sunod-sunod nga gipatay sila Desiderio Camangyan didto sa Barangay Old Macopa, Davao Oriental ug Joselito Agustin sa Laoag City.

Si Camangyan magsisibya sa Sunrise FM samtang si Agustin magsisibya sa Aksiyon Radyo Laoag.

Ang memorandum gipirmahan ni Atty. Renato Heredia, police director, kinsa nagmando sa tanang Community Police Relations (PCR) nga ipatawag ang mga sakop sa media aron mahisgutan ang mga maayong buhaton sa ilang siguridad.

Sa maong tigum kagahapon didto sa DCPO, nahisgotan ang mga butang nga makatabang sa pagpanalipod sa kaugalingon sa mga sakop sa media nga nakadawat og mga hulga sa kinabuhi.

"To those (media practioners) who wanted to possess a firearm, you are allowed to own a gun as long as kumpleto ang dokumento. Para na rin yan sa inyong proteksyon," ni Aspera dihang gipangutana sa Superbalita.

Si Aspera nagpahayag nga gikinahanglan sab mga sakop sa media ang armas apan gikinahanglan sab nga mahimong responsible gun holder ang buot maghupot niini.

Ang DCPO naglaraw nga maghimo og usa ka training alang sa mga sakop sa media aron magamit nila sa pagpanalipod sa kaugalingon. (AD)