USA ka American national ang buot magpakamatay aron dili na siya masikop nga buhi sa mga ahente sa Federal Bureau of Investigation (FBI) sa alas 10:24 sa gabii niadtong Huwebes.

Si SPO3 Emerson Fernando sa Tugbok Police Station nag-ila sa langyaw nga mao si Robert William Longwood, 57, nagpuyo sa Block 77, Lot 7, Deca Homes Subdivision, Barangay Tacunan, distrito sa Tugbok, siyudad sa Davao.

Sa spot report ni Fernando, nasayran nga si Longwood buot magpakamatay gamit ang usa ka hait nga hinigiban sulod sa iyang balay aron dili siya masikop sa mga otoridad uban ni FBI special agent Shaun Gavin nga nadestino sa United States of America Philippine Embassy.

Mga otoridad miabot sa balay ni Longwood sa alas 5:40 sa hapon dala ang warrant of arrest apan wala siya migawas mao nga gihimo sa kapulisan ang negosasyon.

Pipila ka oras ang milabay, suma sa report, nasiplatan nila si Longwood nga naggunit og kahoy nga dunay gitaud nga kutsilyo dayon gibutang sa langyaw sa iyang liog.

Tungod sa gihimo sa langyaw, napugos ang mga otoridad nga mosulod sa balay aron luwason si Longwood kinsa nag-atubang og mga kasong “fraud” didto sa State of Montana, USA.

Si Longwood nakaangkon og samad sa iyang tangkugo hinungdan nga gidala siya didto sa Holy Spirit Hospital ug pipila ka oras gibalhin sa Davao Doctors Hospital.

Ang langyaw dunay live-in partner nga ginganlan og Jiecel, 20; ug nagpuyo sila sa maong lugar sulod sa usa ka tuig ug unom ka bulan.

Sa laing bahin, usa ka 55 anyos nga lalaki ang nalumos samtang naligo sa dagat didto sa Aroma Beach Baywave, Barangay Ilang, siyudad sa Davao niadtong Miyerkules.

Nalumos sa ala 10:30 sa buntag mao si Eduardo Maloya, nagpuyo sa Purok 3-C, Barangay Ilang, sigun sa blotter sa Bunawan Police Station.

Nasayran nga misawom ang biktima sa dagat nga taga tuhod ang gilawmon apan wala na siya nahaw-as sa tubig. Gituohan nga giatake sa sakit sa kasing-kasing ang biktima mao nga nalumos siya.

Si Maloya gisulayan pagdala sa Southern Philippines Medical Center (SPMC) apan dimalas kay dead on arrival siya sa maong tambalanan. (AD)