SA pagtiyabaw ni Albay Congressman Edcel Lagman nga dili mamahimong kibhangan, ni ba kaha putlon sa bag-ong administrasyon ang pork barrel fund allocation sa mga magbabalaud sa hinungdan nga gikinahanglan nga magdaginot karon sa pundo si Presidente Benigno Noynoy Aquino kay gibinlan kini og 340 Billion deficit ni kanhi Presidenti Gloria Macapagal Arroyo.

Kay niya pa, ang pagbuhat niini mahisusama sa pagputol sa kutay sa kinabuhi sa usa ka puya diha sa tagua-angkan sa inahan.

Kay kining ilang pork barrel fund mao may tinubdan nga ilang gikuhan alang sa mga social services sama sa medical assistance, scholarships, livelihood programs, infrastructures nga maoy prayoridad ang ilang mga kabus nga mga konstituente.

Updates on President Benigno Aquino III's presidency

Kining maong dagan sa mentalidad nagpakita usab, matud ni Lagman, nga si Noynoy ug ang iyang mga ginsakpan walay pagsabot sa natad sa macro-economics kay sa pamahayag sa Bangko Sentral ng Pilipinas, ang 340 Billion nagrepresentar lamang og 4 porsiento sa atong GDP (Gross Domestic Product) mao nga dili kaayo kini kabalak-an.

Gawas pa, ang ipatuman nga pagdaginot makahatag lamang og 10 Billion pesos nga savings sa gobyerno nga gamay ra kaayo nga kantidad kon kini ihapak sa ubang kagamitan apan dako na kaayo og ikatabang kon kini diha magahin sa ilang Countrywide Development Fund (CDF) kun pork barrel.

Sa iyang bahin, si Quezon Congressman Loren Erin Tanada miinsistir nga kon niadtong tuig 2004 mihatag og tag 200 milyunes matag senador ug 70 milyunes matag tuig si Arroyo alang sa Pork Barrel, kini nahimong posible kay mipahamtang man ang administrasyong Arroyo og dugang buluhisan sa panagway sa VAT (Value Added Tax) og dugang domestic and foreign borrowings.

Karun sa panahon ni Noynoy gikinahanglang makat-ong moduyog ang mga kongresista sa kahimtang sa atong nagusbat nga ekonomiya og dili mamugos sa naandang kapritso.

Taliwala ning maong nagsumpaking mga baruganan, si Noynoy mipasalig sa tanang mga magbabalaud, maalyado man o taga-oposisyon nga ipabilin ang pundo sa gobyerno alang sa pork barrel ug silang tanan makadawat gyud og paigong bahin. Kay karon siya nakasabot nga dako kaayo og matabang ang pork barrel sa mga Kongresista alang sa pagtabang sa hilit na nga mga distrito sa nasud.

Aron malikayan ang naandang racket sa pagpatong og kickbacks sa mga senador ug congressman, iyang butangan og specific menu ug guidelines ang pagamit sa maong pundo. Dinhi si Noynoy nagtuo nga ang kanhing gimyairan sa katawhan nga pork barrel fund, mao nay mamahimong usa sa epektibong makinarya sa kagamhanan sa poverty alleviation program.

Samtang kita nanghinaot nga kining tanang mga pasalig kahatagan og katumanan. Apan dili gyud kalikayan nga mo-alsa atong ginhawaan matag higayun nga ang ngalan na sa kabus nga katawhan maoy pasanginlan sa mga senador ug congressman nga maoy nabulahan sa ilang pork barrel fund. Kini kay samtang sila nga mga gamhanan nagligid sa pagka-adunahan, ang katawhan nga mao unta’y gipahinungdan ang padayong nagkamang sa kalisdanan.