MAO pa lay pagdaog ni Presidente Benigno Aquino III sa eleksyon niadtong Mayo, daghan na kaayo tag mga pangindahay nga iyang mabuhat aron moarang-arang ang atong kahimtang.

Dugay na man gung nag-antos ang mga Pinoy. Human malumpag ang administrasyong Marcos, nabuhi ang paglaom nga ang nasod makabangon na gikan sa grabeng kalisod.

Updates on President Benigno Aquino III's presidency

Apan ang mao nga pangindahay nagpabiling pangindahay tungod kay kini dangog lang gihapon hangtod karon.

Wa may kausaban nga niabot sa labing ubos nga hut-ong sa katilingban. Asin ra man gihapon ug ginamos ang gikumot uban sa kan-on nga sinabwan og tubig.

Ang administrasyon karon ni P.Noy maoy gilaumang mohaw-as sa nasod gikan sa kalisod.

Apan, di ba kaha gihapon mahimangod ang mga Pilipinhon kon way milagrong mahimo ang iyang pangagamhanan?

Ang kausaban di ra ba magagikan diha lang sa kagamhanan. Tinuod gikan kanila ang kahigayunan ug giya alang sa kalambuan.

Mag-unsa man kining mga kahigayunan kon ang mga Pinoy di kahibawong mohimo sa tagsa-tagsa ka kaakuhan bisan sa yano lang nga paagi?

Makita ni diha sa yano kaayong paglabay sa basura, pagsunod sa balaod sa trapiko, di pagsuburno ug uban pa.

Yano ra ni nga mga buhat apan, kon ang yanong lungsoranon makahimo niini, ang kausaban padung sa kalambuan magasukad dinhi.

Una pa ta maningil sa kagamhanan, una natong paninglon ang atong kaugalingon sa atong mga kaakuhan ning katilingban.