KANHI kawani ni Bise-Gobernador Gregorio Sanchez nipasangil nga gipugos siya sa pagluwat og mga pamahayag aron iduot ang bise gobernador ug pasanginlan nga nalambigit sa anomaliya sa pagpatrabaho kanila sa pribadong farm sa Tuburan.

Si Manuel Montebon naabtan sa mga sakop sa media sa buhatan ni Sanchez kagahapon.

Updates on President Benigno Aquino III's presidency

Matod pa ni Montebon nga nagkakita sila ni Provincial Legal Officer Marino Martinquilla niadtong Hunyo 12 sulod sa buwangan atol sa besperas sa fiesta sa Tuburan.

Gitanyagan siya ni Martinquilla nga tabangan nga makatrabaho gihapon sa Kapitolyo ug makadawat og pahalipay kang Gobernador Gwen Garcia kon moluwat kini og pamahayag batok sa bise gobernador.

Kahinumduman, si Montebon uban sa laing duha niya ka mga kauban nga nagtrabaho sa buhatan sa bise gobernador gipaimbestigar tungod sa pasangil nga gigamit ang ilang serbisyo sa personal nga negosyo ni Sanchez sulod sa pribadong

farm sa Tuburan.

“Miingon siya nga mopirma ko og affidavit against gyud ni Vice Gov. Sila ang bahala sa akong renewal ug ibutang ko sa lugar nga maayo ang pagka himutang. Basin pa ug mahatagan ko og incentives ni Gov. Garcia,” matod ni Montebon.

Sa ilang panagsulti, wa niya gisanong si Martinquilla ug nagsigi kini og insister pagpangayo sa iyang cell phone number, apan wa gyud niya kini hatagi.

Nasayran na lang ni Montebon nga wa na siya gi-renew sa Kapitolyo ug giimbestigar.

Gipasalig usab ni Montebon nga andam siyang moatubang sa imbestigasyon ug mipasalig nga wa siya magtumo-tumo sa iyang pasangil batok kang Martinquilla.

Ang Sun.Star Superbalita nisuway pagkuha sa habig ni Martinquilla, apan wa kini sa iyang buhatan kay adunay importanting tigom nga gitambungan. (JFT)