LABING minos 25 ka mga lumolupyo sa usa ka hilit nga barangay sa lungsod sa Tudela, Camotes ang nagkalibanga ug dunay amoebiasis.

Ang mga biktima nakainom sa kontaminadong tubig gikan sa usa ka atabay sa dapit.

Updates on President Benigno Aquino III's presidency

Sa 25 ka mga lumolupyo, 10 ka mga tawo, sagad mga bata, ang na-confine sa Ricardo Maningo Memorial District Hospital sukad niadtong Martes.

Naglakip pa kini sa usa ka masuso ingon man mga batang nagpanuigon og usa ngadto sa duha ka mga tuig.

Si Dr. Cristina Giango, Provincial Health officer, nikompirmar sa Sun.Star Cebu kagahapon kalabot sa hitabo.

Siya niingon nga pipila sa apektadong mga residente dunay mucus sa ilang mga hugaw, samtang ang uban duna pay pat-ak sa dugo, nga maoy timailhan sa amoebiasis.

Nidugang si Giango nga ang tubig nga giinom sa mga lumolupyo, atol ning ting-uwan, nga nagagikan sa atabay hayan maoy tinubdan niini.

Sa laing interview kagahapon, si Nerissa Gorgonia, chief nurse sa Ricardo Maningo Memorial District Hospital, nisulti sa Sun.Star Cebu nga 10 ka mga tawo ang nanga-admit sa ospital, sagad kanila mga bata.

Ang nanga-admit mao sila si Julian Ace Carmel Pernetes, 11 pa ka buwan ang edad; Joseph Emmanuel Paluga, 9; Meisha Calambo, 6; Axel Rose Sanchez, 8; Chrismarie Tonie Reusora, usa ka tuig ug unom ka mga buwan; Vic Emmanuel Pernetes, 2; Florian Reusora, 18; Nathaniel Maratas, 15; Marjorie Maratas, 18; ug Niel Jake Maratas, 6.

Matod sa provincial ug municipal health officials nga kontrolado na ang insidente ug gisalikway ang taho nga dunay outbreak sa dapit.

Kalabot sa mga taho nga dunay dos anyos nga batang lalake nga nagpuyo sa lugar nga namatay tungod sa pag-inom sa kontaminadong tubig, giklaro ni Giango nga namatay kini tungod sa depekto sa lawas sukad sa pagkatawo niini didto sa Ormoc City niadto pang Martes. (SUN.STAR CEBU)