SI DAVAO del Sur Governor Douglas Cagas nabalaka na sab sa pagkatap sa sakit nga dengue sa lainlaing dapit sa lalawigan sa Davao del Sur.

"We should not panic but we should be alarmed," sigon ni Cagas.

Nanawagan si Cagas sa katawhan sa probinsiya nga manghinlo sa palibot aron way lugar nga kaitlogan ang lamok.

Gisulti sa Provincial Health Office (PHO) nga bisan sa tansan nga adunay pundong tubig makahimo pa pag-itlog ang lamok maong angayang bantayan ang tanang butang sa palibot.

Gisugyot ni Governor Cagas ang pagmugna og task force sa matag lungsod aron matutukan ang makamatay nga kagaw.

Kahinumdoman nga gisulti sa PHO nga sukad sa bulan sa Enero hangtod sayo ning bulana kapin na sa 600 ang mga tawong natakbuyan dinhi sa probinsiya ug 13 na ang namatay sa dengue.

Uwahing biktima mao ang 24 anyos nga babayeng si Mary Grace Manib, lumolupyo sa Barangay Lapu-labao, lungsod sa Hagonoy, Davao del Sur.

Si Dr. Azucena Dayanghirang, provincial health officer, nagkanayon nga 17 na lang ang platelet sa dugo sa dihang nahidangat ang biktima sa bay tambalanan ug wa ray 24 oras nga namatay dayon kini.

Pahimangno ni Dayanghirang nga angayang tagdon gilayon ang simpleng hilanat sanglit kon moubos na gikan sa 120 ang platelet count sa dugo kritikal na gyud ang kahimtang sa pasyente.

Walay vaccine o way tambal sa sakit nga dengue apan mamahimo kining malikayan pinaagi sa pagkugi og panghinlo sa palibot sanglit matag ting-uwan motaas gyud ang kaso niini. (Orlando B. Dinoy)