BALOR P470-mil nga kantidad sa mga kabtangan ug alahas nahanaw gikan sa usa ka negosyante human kini giunay og kawat sa iyang suloguon didto sa Purok Ipil-ipil, Barangay Visayan Village, dakbayan sa Tagum, Miyerkules sa udto.

Nagpatala sa kapulisan mao ang biktimang si Marlon Samper, 38, ug molupyo sa susamang dapit.

Sa report gikan sa Davao del Norte Police Provincial Office, nasayran nga pasado alas 12:00 sa udto nadiskubrihan ni Samper nga ang iyang suloguon nga si alyas Den-den, molupyo sa lungsod sa Asuncion, Davao del Norte, kalit nga mipahawa sa iyang panimalay nga way pananghid.

Dungan sa paglakaw ni alyas Denden, nahanaw sab ang mga kabtangan ug alahas ni Samper.

Sa pagsusi ni Samper, iyang nasuta nga ang iyang jewelry box nga dunay sulod nga usa ka set nga white pearl kantidad og P125,000; usa ka set nga compassion pearl nga nagkantidad og kapin P85,000; usa ka set nga champaign stab nga mikantidad og kapin P45,000; ug uban pang mga klase-klasing mga alahas nga mikatidad tanan og kapin P470-mil ang nahanaw.

Nagtuo si Samper nga nabiktima siya sa kawat sa iyang suloguon nga nagpuyo sa

iyang balay.

Giadtuan sab dayon sa mga pulis ang giingong balay sa suspek aron sutaon kung siya ba gayod ang mikawat sa gamit sa iyang agalon. (Marvin Pineda)