DUHA ka mga sakop sa rebeldeng New People's Army (NPA) nga nasikop sa military ipailawom na sa kapulisan sa lungsod sa Malita, Davao del Sur sa "tactical interrogation."

Dili pa lamang dugay nasikop sa nagpatrolyang sakop sa 39th Infantry Battalion ug Citizen Armed Forces Geographical Unit (Cafgu) ang 28 anyos nga si Benio Caray alyas "Jojo" ug Karot Sumanday alyas "Johnny Boy," 20 anyos, didto sa Sitio Lalon, Barangay Little Baguio sa maong lugar.

Gitunol ang mga suspek ngadto sa kapulisan human gipasakaan og kaso didto sa buhatan sa piskalya.

Si Caray, lumolupyo sa Barangay Upper Suyan, lungsod sa Malapatan, Sarangani province, ug Sumanday nga taga Sitio Lanulan, Barangay Little Baguio, giingong naghupot og usa ka granada ug pinaugang dahon sa gituohang marijuana sa dihang nasikop sa mga sundalo.

Nilutaw sa pagsubay sa militar nga mga sakop ang duha sa Platton Mazda sa Group Front 71 sa Far South Mindanao Region (FSMR) ug naglihok sa bukirang bahin sa Malita.

Dungan niini, gidayeg sa kasundalohan ang mga sakop sa Barangay Defense System (BDS) nga maoy nagpahibawo kanila hinungdan sa pagkasikop sa mga suspek.

Si Lieutenant Colonel Lyndon Panisa, 39th IB commanding officer, nitunol sa iyang pasalamat ngadto sa mga sakop sa BDS ug ni-awhag nga mas pakusgan pa ang ilang pagsuporta pabor sa gobyerno aron daling gukdon ang mga rebelde.

Nakig-alayon na sab sa ilang pwersa ang kapulisan aron pakusgan ang intelligence monitoring human niguwa sa taho nga anaa ra sa bukirang bahin sa Malita nagpahipi ang mga rebelde. (Dondon Dinoy)