HUMAN gimandoan ang tagdumala sa mga mall dinhi sa siyudad sa Davao nga magbutang og dugang security guards sa ilang parking area aron dili makasulod ang mga Bukas Kotse Gang, apan nakahimo gihapon og krimen ang mga kawatan sulod sa dakong mall sa dalang Bajada niadtong Huwebes.

Ang insidente nahitabo sa alas 5:00 sa hapon nga miresulta sa pagkahanaw sa mga importanteng butang nga gipanag-iyahan ni Victor Orantes, 55, minyo, Telecom Manager ug nagpuyo sa Venus Street, Toril Poblacion, ning siyudad.

Si Orantes midangop sa Sta. Ana Police Station aron ipatala nga nabiktima siya sa wala mailhi nga Bukas Kotse Gang kinsa miatake sa iyang Mitsubishi Lancer nga dunay plate number UFV-241.

Matud ni Orantes nga iyang giparada sa second level parking area sa maong patigayon ang maong sakyanan sa alas 4:30 sa hapon ug iyang giseguro nga nasirado apan sa iyang pagbalik nahanaw na ang bag nga dunay mga iportanteng dokumento ug cellular phone nga nagkantidad og P18,000.

Sa pagsusi sa kapulisan, nasuta nga walay timaan nga gipugos pag-abli ang pultahan sa sakyanan mao nga nagtuo sila nga suhito nga moabli ang mga kawatan.

Sa laing bahin, usa ka suspetsadong kawatan ang nasikop human niya gilimas ang mga mahalong butang sa iyang silingan didto sa Nova Tierra Subdivision, Barangay Hizon niadtong Miyerkules.

Nasikop mao si Loyd Gonzaga, 28, dunay live-in partner ug nagpuyo sa Durian Street, Nova Tierra Subdivision.

Si Gonzaga nasuta nga siya ang nagkuha sa mga mahalong butang ni John Russel Daugnty, 67, Austrian national, manager sa Comval Resources Corporation ug nagpuyo sa Mahogany Street, Nova Tierra Subdivision.

Nasakmit sa kapulisan gikan sa suspetsado ang usa ka laptop, DVD player, Olympus Digital Camera, Sony handycam, Omni emergency light ug Wow fiesta magic sing.

Ang suspetsado atua karon gipriso sa selda sa kapulisan sa Sasa samtang gihikay ang pagpasaka og kasong robbery batok kaniya ngadto sa korte. (AD)