DATU PIANG, Maguindanao -- Usa ka tres anyos nga batang lalaki ang napatay samtang ang Armed Forces of the Philippines nagkatakus sa armadong pundok didto sa Datu Piang, Maguindanao niadtong Huwebes.

Si Lieutenant Colonel Randolph Cabangbang, tigpamaba sa Eastern Mindanao Command sa AFP, nagtug-an nga ang 29th Infantry Battalion gihasi sa 50 ka mga armado nga gipangulohan sa usa ka Tata Uy sa alas 11:45 sa buntag sa Barangay Reina Regente.

Miulbo dayon ang pinusilay nga milungtad sa unom ka oras una ang mga armado misibog biniyaan ang tres anyos nga si Jayhal Abdul nga patay na. Laing unom ka mga samaran giila nga sila si Tadcan Abdul, nuybe anyos nga si Amiyon Kasim, tres anyos nga si Laga-laga Kasim, katorse anyos nga si Muslimin Sali, Tutin Ebus, ug Fatima Busca.

Matud ni Cabangbang nga mga bata naigo sa 81mm mortar nga gipabuto sa grupo ni Tata Uy nga milampas sa tumong ug mitugpa sa Sitio Binandal, Barangay Macasandeg sa lungsod sa Pikit, North Cotabato.

Apan ang taho sa Moro Islamic Liberation Front pinaagi sa Luwaran.com, nagsulti nga mga biktima naigo sa mga bomba gikan sa detachment sa 29th IB sa Army sa alas 2:55 sa hapon.

Mga biktima nanagan sa luwas nga lugar dihang naigo sa mortar samtang nahitabo ang away didto sa Reina Regente tali sa 29th IB ug mga CVO batok sa pundok ni Tata Uy tungod sa rido.

Sumala sa taho nga 5 ka rounds sa 81 mortar shells miigo sa Barangay Macasendeg ug usa niini maoy nakaigo sa mga biktima.

Mga biktima mga bakwit gikan sa Barangay Dasawao, usa ka balangay nga silingan sa Reina Regente. Sila nagtukod didto og payag sa Macasendeg sukad nga nahitabo ang away tali sa kagamhanan ug sa MILF niadtong Agosto 2008 nga nahimo tungod sa nabughat nga pagpirma sa GRP-MILF Memorandum of Agreement on Ancestral Domain.