LAING bana ang nilanding sa balay tambalanan human giluba sa kaugalingon nga asawa niadtong Huwebes mga alas 4:00 sa hapon, sa Abellanosa St., ning siyudad sa Cagayan de Oro.
Giila ang biktima nga mao si Rod Sambas, 32, minyo, sa susamang dapit. Gitumbok nga suspetsado ang ang asawang si Trina.
Ginamit ang icepick, nakaangkon og samad sa iyang abaga si Sambas human sa panagbikil nga nahitabo tali sa magtiayon.
Gisaysay sa biktima nga buntag pa nianang nanaghid ang iyang asawa nga molakaw, dihang nakalakaw na kini naaghat nga mag-inom uban sa iyang mga silingan ang biktima daplin sa dalan kuyog ang usa ka babaye nga silingan ra usab niini.
Apan wala namatikdan sa bana nga miuli na niadtong tungora si Trina ug nakurat pag-ayo dihang kalit lamang kining nasuko hinungdan sa ilang panaglalis.
Nagtuo si Sambas nga nagselos ang iyang asawa hinungdan sa kasuko nga gibati niini nga miresulta sa pagpangluba ngadto kaniya.
Hinuon, out-patient sa Northern Mindanao Medical Center (NMMC) ang biktima ning panahona nga walay planong mosang-at og reklamo batok sa asawa. (SVB)