MIGAWAS ang utok sa 9 anyos nga tinun-an samtang nabalian og bukog ang 6 anyos nga higala niini human nabanggaan og motorsiklo niadtong Huwebes mga alas 4:30 sa hapon, didto sa Barangay San Antonio lungsod sa Talakag, Bukidnon.

Nakabsan sa kinabuhi si Rodney Serona, 9, tinun-an og Grade II sa San Antonio Elementary School samtang Kritikal ang kondisyon sa Grade I nga tinun-an nga mao si Ronnel Toto, 6, sa susamang barangay.

Ang mga biktima gipangdala sa Northern Mindanao Medical Center (NMMC) ning siyudad sa Cagayan de Oro.

Gibutyag sa usa sa personahe sa NMMC nga nahinabi sa Sun.Star SuperBalita nga gikan ang mga biktima nagtungha og paingon na nga manguli sa ilang tagsa-tagsa ka mga puloy-anan.

Dihang kalit lang nga nabanggaan sa kusog kaayong mipadagan nga motorsiklo nga gimaneho ni Renandy Ecatan, residente sa susamang lungsod.

Nanglagpot ang duha ka mga biktima tunga sa dalan ug maoy nagrabehan si Serona nga nigawas ang utok, nabuak usab ang ulo niini. Nabalian ang 6 anyos ug grabeng bun-og sa lawas ang naangkon niini.

Gidala pagdali ning siyudad ang mga biktima apan si Serona nakabsan sa kinabuhi pipila ka oras ang nilabay sulod sa balay tambalanan. Si Toto kritikal ang kahimtang.

Giresponde sa kapolisan sa Talakag Police Station ang insidente ug nasikop ang suspek kinsa namatikdan sa mga polis nga apektado kaayo ug ilimnong makahubog niadtong tungora.

Ang mga ginikanan sa biktima gikatakdang mopasaka og kaso batok sa suspek human dili pa madawat ning panahona ang kamatayon ni Serona ug ang kondisyon ni Toto nga padayon pang giobserbahan sa mga doktor.

Gipanawagan usab sa pipila ka mga ginikanan nga mas pahugtan ang seguridad gawas sa tunghaan tungod sa sunod-sunod nga natigayong aksidente sa dalan diin mga biktima mga tinun-an.