KUSGANON nga gipanghimakak ni Capitol Consultant Rory Jon Sepulveda nga ilang gipugos ang kanhi kawani sa bise gobernador nga mo-testigo batok kang Bise-Gobernador Gregorio Sanchez.
Si Manuel Montebon maoy niduol kang Provincial Legal Officer Marino Martinquilla nga andam siyang moluwat og affidavit batok kang Sanchez pagmatuod sa aligasyon.
Si Sepulveda niingon nga usa niana ka higayon, niduol kaniya si Martinquilla ug nipahibawo nga gustong moluwat og affidavit si Montebon pagmatuod nga sila gipatrabaho sa pribadong farm ni Sanchez.
“Wa gyud mi namogos niya (Montebon). Siya maoy unang midool kang Martinquilla isip iyang classmate sa Tuburan sa dihang nagtungha pa na sila. Ingon ana gyud ang duwa ni Gorio (Sanchez), kusog mobali og estorya,” matod ni Sepulveda.
Matod ni Sepulveda nga iyang gisultihan si Martinquilla nga kon gusto moluwat og affidavit si Montebon, paadtuon kini sa iyang opisina sa Capitol, apan wa gyud niya kini buhata.
Gibutyag usab ni Sepulveda nga si Montebon mi-absent without official leave (AWOL) sulod sa unom ka mga buwan sukad pa niadtong Enero.
Human nila masayri hinapos sa milabayng tuig ang pagpatrabaho sa tulo ka mga kawani sa pribadong farm ni Sanchez, si Montebon gipatrabaho pagbalik ni Gobernador Gwen Garcia ug gidistino sa Provincial Agriculture.
Apan sukad nga gidistino niadtong Enero, wa gyud kini mopakita sa maong buhatan.
Sa sayo pa, si Montebon nga nahinabi sa mga Capitol reporter nialigar nga gihaylo siya sa Kapitolyo aron mobarog isip saksi batok kang Sanchez. (JFT)