SULIRAN sa gugma maoy rason sa suway nga pagpakamatay sa usa ka salesgirl nga buot unta nga moambak sa unang taytayan sa Mandaue ug Mactan sa miaging gabii.
Nitumaw ang pagduda nga mabdos ang babaye nga ang amahan mao ang iyang kapuyo nga giingong minyo.
Usa ka concerned citizen nga nagmotorsiklo maoy ni-report sa Lapu-Lapu City Police Office (LLCPO) may labot sa iyang nalabyan nga babaye nga nagtinguha sa paglayat sa taytayan.
Dali nga niresponde ang mga sakop sa Special Weapons and Tactics (SWAT) team nga gipangulohan ni P/Insp. Joeson Parallag aron sa pag-rescue sa babaye nga nailhan lang sa ngalan nga Gretchen.
Matod pa ni Parallag nga ilang naabtan si Gretchen nga gitabangan og pugong sa mga motorista aron di makalayat sa bridge mga alas 9 pasado niadtong Huwebes sa gabii.
Iyang gihulagway nga nagpunay og hilak ug siyagit ang maong babaye ingon man kanunay nga nilugnot gikan sa mga tawo nga hugot nga nagkupot kaniya.
Base sa initial nga impormasyon sa Women’s Desk sa LLCPO nga ang babaye, 20 anyos, adunay kapuyo,lumad nga taga-Daanbantayan, lalawigan sa Sugbo, apan kasamtangan nga nagpuyo sa sityo Sudlon, Barangay Maguikay, Mandaue City.
Si Gretchen trabahante sa usa ka dakong tindahan sa M.L. Quezon Avenue, Pajo, Lapu-Lapu city.
Gibutyag ni SP03 Editha Patalinjug nga nagdumili sa pagtubag ang maong babaye sa dihang ilang gipangutana sa hinungdan sa tinguha niining paghikog.
Nasayran nga gibiyaan diay siya sa iyang kapuyo. Sa iyang pag-uli sa ilang gipuy-an wa na kini diha.
Ang mao nga lalake maoy natingban sa iyang gugma.
Dugang pa ni Patalinjug sa ilang pakighinabi sa babaye nga mabdos kini ug giingong minyo ang lalake nga gikapuyo niini.
Si Gretchen gi-turnover ngadto sa buhatan sa Department of Social Welfare and Development (DSWD).