WA NA gyuy makabakwi pa sa baruganan ni Kris Aquino nga makigbuwag sa asawang si James Yap.

Say pa, bisan unsaon pagbali-bali, final na gyud ang desisyon sa TV host.

Sumala pa sa Marcos Ochoa Serapio and Tan, ang law firm nga giduol ni Krissy, ginahan-ay na ang tanang legal nga aspeto sa ilang panagbuwag sa basketbolista.

Say pa nga klaro na gyud nga wa nay tsansa pa nga mahilot ang marital problems sa duha.

Sa report sa TV Patrol, gibutyag sa source gikan sa maong law firm nga mihangyo na ang aktres nga sugdan na ang legal proceedings sa iyang pakigbuwag sa bana.

Gina work-out na sab ang official statement ni Krissy nga makita sa The Buzz karong adlawa.

Soul searching

Human makurat ang katawhan sa iyang rebelasyon sa The Buzz, hilum sab nga mibiya sa nasud si Kris.

Uban ang anak nga sila Baby James ug Josh, miadto og US ang tulo alang sa tulo ka semana nga bakasyon sa Orlando, Florida.

"We're going to take a Disney cruise then go to Disneyworld. I think they are very excited. We're looking forward to the vacation," ni Kris, sa interview kaniya sa ABS-CBN North America News Bureau sa Los Angeles, California.

Excited na sab ang mga anak ni Krissy sa maong bakasyon, hilabi na nga first time pa ni Baby James ang pagbisita sa Disneyworld.