USA ka lalaki napalgang wa nay kinabuhi sulod sa ilang panimalay human gituohang nagpakamatay didto sa Urban Poor Subdivision, Barangay Cagangohan, siyudad sa Panabo, Biyernes sa kaadlawon.

Nailhan ang biktima nga mao si Quiciano Zafra, 48, usa ka pedikab drayber, molupyo sa susamang dapit.

Sa report gikan sa Panabo City Police Station nasayran nga pasado alas 12:30 sa kaadlawon napalgan na lamang sa iyang asawa nga si Angelita ang biktima nga wa nay kinabuhi nga nagbitay sa kusina nga bahin sa ilang balay.

Sa inisyal nga pakisusi ni PO3 Johnny Calamba sa Panabo CPS nasuta nga gituohang nagpakamatay ang biktima pinaagi sa paghikot og pisi sa liog dayon bitay sa iyang kaugalingon ngadto sa nagbabag nga kahoy.

Matud sab ni Angelita nga pasado alas 10:00 sa kagab-ihon nagtapad pa sila sa iyang bana nga nangatulog sa ilang lawak ug diha na lamang iyang namat-an nga wa na sa iyang kiliran ang iyang bana.

Sa pagsusi ni Angelita, nakit-an na lamang niya ang iyang bana nga nagbitay na ug wa nay kinabuhi.

Gisuwayan pa unta nila og luwas ang biktima apan wa na gayod siya nagginhawa.

Nagtuo ang mga kabanay nga posible ang dugay na nga balatian nga giantus sa biktima ang hinungdan sa pagkutlo niya sa iyang kinabuhi.

Dunay mga higayon sab nga nagapamamilit na ang biktima sa iyang mga mahal sa kinabuhi.

Kapulisan sa siyudad sa Panabo mihimo pa og dugang imbestigasyon sa nahisgutang hitabo.

Dugang pakisusi gihimo sa mga otoridad aron sayron kung duna bay foul play sa kamatayon sa biktima. (Marvin Pineda)