USA ka lalaking gituohang latagaw napalgang wa nay kinabuhi sa usa ka waiting shed didto sa Purok 9, Barangay Poblacion, lungsod sa Nabunturan, Comval Province, pasado alas 10 sa gabii, Biyernes.
Nailhan ang biktima nga si Donie Basinga, hamtung ang panuigon, molupyo sa lungsod sa Bayugan 1, Agusan del Sur.
Sa report gikan Nabunturan Municipal Police Station, nasayran nga napalgan na lamang sa katawhan sa dapit ang biktima nga nagbuy-od, wa nay kinabuhi.
Ang biktima sumala pa latagaw sa maong lungsod, matag gabii diha siya magpundo sa maong waiting shed aron magpalabay sa kagabhion.
Uwahing nakita ang biktima nga nagluya nga gituohang may gihambin nga balatian sa lawas.
Sa paghiling sa otoridad sa lawas sa biktima, way nakitang timailhan nga gipatay kini, gituohan nga namatay kini sa sakit.
Ang patay'ng lawas sa biktima gipahiluna na karon sa may Montoya Funeral Parlor sa lungsod sa Nabunturan.
Gisubay na sab sa mga otoridad ang mga higala ug kabanay niya aron maoy mokuha sa patay'ng lawas niini. (Marvin Pineda)