1 tawo patay sa baha

USA ang patay samtang usa pa ang padayong gipangita sa otoridad human maanod sa kusog nga pagbaha alas 4:00 sa hapon, Biyernes, didto sa probinsiya sa Maguindanao.

Ang biktima giila sa kapulisan nga si Gilbert Villanueva, 39, minyo.

Padayon pa sab nga gipangita si Bro Mandot.

Si Maguindanao Police Provincial Director Alex Lineses nagsulti nga patabok ang mga biktima sa dakong sapa sa Barangay Kuya, South Upi sakay sa ilang duha ka binuhing kabayo, apan kalit nga miabot ang kusog nga bul-og sa tubig nga mianod sa mga biktima.

Patay na nga nakit-an si Villanueva nga nasangit sa sanga sa kahoy kilid sa sapa samtang hangtud ning pagsuwat gipangita pa si Mandot nga gituohang nakabsan na sab sa iyang kinabuhi.

Sa pikas bahin, miabot na sab sa 3,407 ka pamilya ang mihiklin sa Sultan Mastura ug Sultan Kudarat Maguindanao lakip na sa Cotabato City tungod sa grabeng pagbaha gumikan sa pagtaas sa tubig sa Rio Grande De Mindanao.

Sa kasamtangan, nagpadayon ang pag-ulan sa Central Mindanao.

Gitahasan dayon ni Maguindanao Governor Esmael Mangudadatu ang Provincial Disaster Coordinating Council nga molihok dayon aron luwason ang mga sibilyan nga naipit sa baha, inabagan sa militar ug kapulisan.

Nagpaabot na sab og hinabang si Mangudadatu sa mga biktima sa baha nga temporaryong nanimuyo sa mga eskwelahan nga gihimong evacuation centers sa lugar. (Edgardo Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph