BAYNTE-nuybe ka mga tawo ang gisikop samtang mokabat sa tunga sa milyon ka pesos ang kantidad sa mga shabu ang nasakmit sa mga otoridad sa gihimong ronda sa alas 7:00 sa buntag kagahapon didto sa Purok 3, Barangay 31-D Poblacion, siyudad sa Davao.

Mga suspetsado gisikop pinaagi sa search warrant number 1342, 1343, 1344, 1345, 1346 ug 1347 nga gipaguwa ni Regional Trial Court (RTC) Executive Judge Isaac Robillo Jr. nga giserbe sa hiniusang pwersa sa Drug Enforcement Unit (DEU) sa Davao City Police Office (DCPO) ug Criminal Investigation and Detection Group (CIDG) Region 11.

Sa tanang ihap sa mga dinakpan, unom kanila ang nakuhaan og shabu hinungdan nga ipasaka ang kaso ugma (Lunes) sa korte samtang ang 22 ka mga tawo gipailawom sa imbestigasyon ug drug testing aron sutaon ang ilang kalambigitan sa pagpayuhot og druga.

Gisikop tungod kay sila ang mga tawo nga gitumong sa search warrant ug dunay nakuha nga mga druga mao sila Robelyn Remulta, alyas Bebeng, 28; Marcelita Adin, 33; Naima Butocan, alyas Butching, 24; Pidong Bandera, alyas Pidong, 57, minyo, sari-sari store owner; Amelita Bayabao, 25, asawa ni Samad; Salazar Bayabao, alyas Kusa, 23, minyo, pulos nagpuyo sa Purok 8, Barangay 31-D Poblacion, ning siyudad.

Sa maong ronda, nakaikyas gikan sa mga otoridad si Samad Bayabao (bana ni Amelita) hinungdan nga gipangita siya karon sa mga sakop sa CIDG 11.

Ang silingan sa magtiayong Bayabao nga si Sarah Tausing, 34, minyo, gisikop sab sa kapulisan tungod kay naghupot siya og 16 ka pakete nga shabu mao nga giapil siya pagdemanda ngadto sa korte.

Nakuha gikan kang Remulta ang lima ka pakete sa shabu, walo kang Adin, duha kang Botocan, lima ka pakete ug tulo ka sako gikan kang Bandera, upat kang Amelita ug walo kang alyas Kusa.

"Nironda namin ang kanilang mga bahay matapos malaman namin galing sa aming informant na rampant talaga ang bintahan ng shabu naturang lugar," ni CIDG 11 director Police Sr. Supt. Generoso Bonifacio dihang gihinabi sa Sun.Star Davao SuperBalita kinsa midugang nga, "the street value of confiscated drugs more or less 400 to 500 thousand pesos."

Si Bonifacio nagbutyag nga unom ka mga tawo ang tumong sa maong search warrant mao nga ilang gisusi ang balay sa mga suspetsado.

"Well, we confiscated many sachets of shabu and a cash amounting to P30,000. Nakuha namin ang drugs sa buhangin dahil doon nila inilibing kasali na ang pera," pahayag ni Bonifacio kinsa midugang nga ang pagkasikop sa mga suspetsado pinasubay sa ilang flagship project nga Oplan Big Berta.

Mga dinakpan miangkon namaligya sila og shabu tungod sa kalisud sa panahon ug wala silay laing trabaho nga ikabuhi sa ilang pamilya.

Sa pagsuwat ning balita, giandam na sa mga opisyales sa CIDG ang 22 ka mga tawo aron ipailawom sa drug testing didto sa PNP Crime Laboratory.