MAKIGHARONG na ang tulo ka mga Pinoy nga sila si Bernabe Concepcion, Nonito “The Filipino Flash” Donaire ug Eden Sonsona sa ilang mga Latino nga kaabang karong buntag sa Coliseo Jose Miguel Agrelot sa Hato Rey, Puerto Rico.

Sa nangahisgutan, si Concepcion (28-3-1, 15KOs) maoy mosagubang sa labing lisod nga tahas tungod kay suwayan niya pag-ilog ang korona sa wala’y pildeng si World Boxing Organization (WBO) featherweight champion Juan Manuel Lopez (28-0, 25KOs) sa main event sa “The Challenge” boxing promotion.

Updates on President Benigno Aquino III's presidency

Nagkanayon si Concepcion nga ning awaya, sama gyud sa training sa iyang manager nga si pound-for-pound champion Manny Pacquiao ang iyang gisunod ubos sa paggiya sa Pinoy trainer ni Pacquiao nga si Buboy Fernandez.

“Hindi tayo nagpunta dito sa Puerto Rico para magbakasyon, sabi ko (kay Bernabe). Pumunta tayo dito para pag-uwi ng Pilipinas meron tayong dala (ng korona),” matod pa ni Fernandez sa interbyu sa ABS-CBN.

Gipasalig ni Concepcion nga dili gyud niya usikan kining dakong oportunidad nga niabot sa iyang kinabuhi hinungdan nga grabe gyud kaayo ang iyang pagpangandam.

“Napakalaking karangalan po n’yang [laban] kaya pinaghandaan ko ng husto,” pasabot ni Concepcion.

Sa mga nahiunang interbyu, si Lopez miasoy nga bisan dako ang iyang pagsalig nga modaog, dili gyud siya mokompiyansa bisa’g gamay tungod kay sayod siyang aduna sa’y ikabuga si Concepcion.

Sa iyang bahin, si Donaire (23-1, 15 KOs) modepensa sa iyang World Boxing Association (WBA) interim super flyweight title batok kang Mexican challenger Hernan “Tyson” Marquez (27-1, 20 KOs) sa top supporting bout.

Inilog kaayo si Donaire ning awaya apan dili sab gyud siya angayang mokompiyansa bisa’g gamay.

Samtang si Sonsona (21-5, 7KOs) makigbatok kang Puerto Rican Jonathan Oquendo (18-2, 11KOs). Importante kining awaya alang kang Sonsona kay posibleng mahatagan siya’g title fight kon molampos siya niini.