DUNAY nakaingon nga mas mayo unta gyud kon hilom na lang nidawat si Mar Roxas sa iyang kapildihan sa miaging piliay ngadto kang Bise Presidente Jejomar Binay kay, basi dsa atong mga balaod karon, hinay gyud kayo ang proseso ug moabot na lang ang sunod piliay, di pa mahuman ang protesta.
Sama pananglit kang Tining Martinez nga nidaog sa iyang protesta sa miaging termino, mga usa ka bulan lang gyud intawn siyang nakalingkod isip kongresista.
Gani, si Sen. Loren Lagarda nibiya na lang sa iyang protesta kaniadtong nidagan siya pagka bise presidente sa 2004 tungod sa kahinay, Nidagan na lang siya alang sa pagka senador.
Ang tigpamaba ni Binay nagkanayon sab nga ang protesta ni Roxas mopakunhod sab sa pagsalig karon sa katawhan alang sa atong unang automated election.
Sa akong bahin, nakaingon sab ko nga mas maayo na lang gyud unta nga motutok na lang si Roxas sa pagtabang kang Presidente Noynoy Aquino nga maka-deliver sa iyang mga saad karong napresidente na ug mangandam alang sa 2016. Dako ra ba kaayo nga gasto kining protesta ug mahimo na untang magamit ni Roxas ang iyang igahin sa protesta ngadto sa iyang kampanya.
Kini kon ang personal nga kaayohan ang gitan-aw ni Roxas.
Apan sakto si Presidente Aquino nga dunay katungod si Roxas nga moprotesta labi na nga duna sab gyud siyay mga lehitimo nga mga rason sama sa kadaghan sa mga balota nga wa ipha kay kuno nasayop ang botante.
Dinhi ra ba nahitabo ang taas kaayo nga kadaghanon sa null votes sa mga balwarte ni Roxas.
Sa akong tan-aw, di sab tukma ang rason nga makunhoran ang pagsalig sa katawhan sa eleksyon. Hangtod karon man sab gud, ako mismo nagduda gyud nga dunay mga tikas nga nahitabo apan lisod lang kining masakpan na tungod kay computer na man ang gigamit sa pag-ihap.
Tingale, maayo na lang kining protesta ni Roxas aron matan-aw gyud pag-ayo ang proseso sa piliay ug pag-ihap labi na ang mga source code ug ubang programa nga gigamit sa mga Pcos machine.
Kon way makit-ang anomaliya, makaingon kita nga sakto lang nga atong saligan ang automated election.
Kon duna may makit-ang tinunto, aw, ato nang matun-an dayon giunsa kini ug mahimoag mga lakang aron di na mausab sa umaabot pang mga piliay.
Sa ingon niining pagtan-aw sa protesta ni Roxas, makaingon kita nga dunay kaayohan kining mahatag sa nasod. Ug ang iyang dakong gasto maingon nato nga dakong sakripisyo.
HUSTISYA
Nganong “wangwang” man kuno ang unang prayoridad ni Presidente Aquino ug di ang “bangbang” nga mas bug-at kay klarong nagpadayon pa man ang pagpamusil sa mga aktibista?
Kining mga nagkwestyon makaingon ko nga wa gyud makaila kang Justice Secretary Leila de Lima nga gidayeg karon nga seryusong moduso sa mga kaso labi na niining mga salvaging ug asasinasyon sa mga lider sa mga community organizations.
Tarong ug estrikto man gud kuno kini si de Lima ug nakapakita na sa iyang labok isip hepe sa Commission on Human Rights (CHR) sa panahon ni Presidente Gloria Arroyo.
Bisan pa man og way klaro alang kanako ang pipila sa ubang mga appointment diha sa Aquino Cabinet, uyon ko sa niingon nga kining pagtudlo kang de Lima usa ka inspired move.