MAAYONG sample kining pag-ban sa tibuok kinabuhi nga maka-drive sa duha ka mga driver nga nangalambigit sa duha ka dagkong mga aksidente sa dalan dinhi sa Sugbo.

Dugay na unta kining angay nga gibuhat sa Land Transportation Office (LTO-7), di kay karon lang.

Hayan hagbay rang naminusan ang mga drayber nga magpataka ug mapasagaron sa ilang pagpadagan, way paghuna-huna nga naa sa ilang mga kamot ang kinabuhi sa ilang mga pasahero.

Updates on President Benigno Aquino III's presidency

Daghan ra ba kaayong mga PUJ driver nga mangasuko kon badlungon sa ilang pagpakusog sa pagpadagan. Maora bag sila ang tag-iya sa imong kinabuhi ug hari sa karsada.

Pinaagi ning tibuok kinabuhi nga pag-ban, hayan magmatngon na og maayo ang mga drayber sa ilang pagmaneho.

Sa pag-examine sa mga taga LTO sa mga drayber V&JA, ilang napalgan nga daghan pag kakuwang sa kahibawo sa luwas nga pagmaneho ang mao nga mga kawani.

Ilang napalgan nga nagpaturagas lang sa pagpadagan ang mao nga mga drayber ug way pagpakabana sa road signs.

Di ra ba kay kani rang duha ang ingon ini momaneho. Daghan kaayong drivers nga nagpataka lang sa pagpadagan bisan dunay road signs nga magpahinay kay accident prone ang dapit.

Bisan pila pa ka road signs ang ibutang, kon di kini ubanan og bug-at nga mga silot nga ipahamtang sa mga kalapasan sa pagmaneho, grabeng monitoring sa mga karsada ug tinud-anay nga pag-edukar sa mga drayber, makapaabot kita sa dagko gihapong mga trahedya.

Kay ang pagbadlong ug pagpitol sa usa ka tawo di diha-diha modut. Sama sa lansang, gikinahanglan pa kining pakngon sa makadaghan aron modut ug malubong.

Ingon sab ini ang angay buhaton sa LTO.