NALUMOS ang usa ka 13 anyos nga nanguhag bangus sulod usa ka fishpond niadtong Bieyernes sa gabii sa Brgy. Guinsay, dakbayan sa Danao.

Sa report sa Danao Police Station, si SPO2 Felix Matbagon ni-report sa maong insedente, diin ang biktima gidali pagdala sa Danao District Hospital.

Sa pagresponde nilang SPO1 Glenn Manulat didto sa hospital, nailhan ang biktima nga si Roque Vallejo,1st year high school sa Carmen National High School, residenti sa Sitio Central sa nahisgutang barangay.

Updates on President Benigno Aquino III's presidency

Sumala pa niya ang biktima kuyog sa iyang mga silingan nga nanguhag bangus sa bag-o pang gi-harvest nga fishpond.

Apan nakit-an nalng kini sa iyang mga kauban nga nalumos na sa lapukon nga lugar.

Daling gidala sa tambalanan ang biktima apan gideklarar sa mga doctor nga dead-on-arrival.

Si SPO3 Winry Pilapil, sa Danao Police Station nga nahinabi sa Sun.Star Superbalita nagkanayon nga giduso karon nila nga ipaeksamin ang lawas sa biktima aron masuta kon wa bay foul play ang kamatayon niini. (Guam P. Logroño)