MGA sakop sa Regional Mobile Group (RMG-7) gipapauli na sa miaging adlaw gikan sa lungsod sa Compostela, Sugbo.

Si Sr. Supt. Erson Digal, director sa kapulisan sa lalawigan sa Sugbo, niingon nga gipa-pullout na niya ang RMG-7 gikan sa Compostela human nibalik na sa normal ang sitwasyon sa lungsod.

Kini tungod sa bangi tali sa kampo ni Mayor Ritchie Wagas ug nidaog sa pagka-mayor Joel Quiño diin way giproklamar ang Commission on Elections (Comelec) nga mananaog. Paabuton una nga mahukman ang petition ni Wagas sa 2nd Division.

Updates on President Benigno Aquino III's presidency

Si Digal nagkanayon nga ang duha ka platoon sa RMG-7 wa kinahanglana ug ang Special Reaction Units (SRU) na lang maoy nagpabilin sa Compostela.

Sumala pa niya nga ang SRU moabag sa mga pulis sa Compostela sa pagpatunhay sa kahapsay ug kalinaw sa dapit.

Nihangyo kaniya si Dept. of Interior and Local Government (DILG-7) Regional Director ug Acting Mayor Pedro Noval nga ipabilin lang una ang ubang pulis.

Usa sa ilang nasabutan nga ang mga pulis maoy mangunay sa paglista sa logbook sa mga tawo nga moduaw sa legislative building ug munisipyo.

Gipadayag niya nga gituyo kini aron mapugngan ang bisan unsang dautang mga panghitabo samtang nagpadayon sa pagtuki ang 2nd Division sa Comelec labot sa protesta ni Wagas. (Guam P. Logroño)