NABABHA ang mga abaga sa managtiayong mga tiguwang nga mag-uuma human gitigbas sa ilang silingang mag-uuma sa miaging adlaw sa Brgy. Banhigan, lungsod sa Badian, Sugbo.

Ang mga biktima giila sa kapulisan nga sila si Eleazar Saldua, 84, ug asawa niining si Potenciana, 80, samtang ang suspek giilang mao si Gaudencio Benemerito, 81, biyuda, usa usab ka mag-uuma.

Si Benemerito nitahan hinuon human sa pagpanigbas ug kasamtangan nga gitanggong samtang gihikay pa ang tukmang kaso batok niini.

Updates on President Benigno Aquino III's presidency

Sa imbestigasyon sa kapulisan sa Badian, ang managtiayong Saldua sayong nigikan sa ilang balay paingon sa ilang umahan diin dunay pananom nga maisan dihang kalit kalit nga nibutho sa dalan ang suspek.

Way daghang pangutana gipanigbas ang magtiayong Saldua.

Si Eleazar nakaangkon og dagkong mga samad sa iyang walang abaga, samtang si Potenciana nakaangkon usab og duha ka mga samad tinigbasan sa iyang walang abaga.

Human sa insidente, ang mga biktima gidali sa pagdala sa tambalanan sa Badian, apan gumikan sa ka seryuso sa ilang mga samad gidali usab sa pagbalhin sa tambalanan sa dakbayan sa Sugbo.

Bangi sa yuta maoy gitumbok sa kapulisan nga hinungdan sa pagpanigbas diin ang pamilyang Saldua ug ang suspek dugay nang nagkabangi sa yuta nga ilang gitikad. (Guam P. Logroño)