TULO ngadto sa upat ka dagkong mga buhawi ang nakapagubot sa mga lumolupyo sa lungsod sa Compostela ug Danao city kagahapon sa hapon.
Ang mao nga mga buhawi niigo sa kadagatan sa mao nga mga dapit nga gisundan sab sa pagbunok sa uwan ug pag-igo sa kilat.
Ang buhawi gihulagway sa mga nakasaksi nga dagko pa sa punoan sa dakong buli nga diha ra sa kadagatan niigo.
Maayo gani wa kini moigo sa yuta kay kon nahitabo pa kini, grabe ang kadaot nga namugna.
Hinuon way gikatahong naigo ug naangol nga mga mananagat sa dapit samtang ang Philippine Atmospheric Geophysical Astronomical Services Administration (PAG-ASA- Mactan) niingon nga di kini ikatingala tungod kay panahon na sa ting-uwan.
Apan nipadayag sila sa ilang kabalaka nga mas dako og kadaot kon ang maong mga buhawi nga nakit-an kagahapon nihagsa pa sa yuta ug niigo sa mga balay.
Ang mga buhawi nakakuhag pagtagad sa mga tawo nga nagpuyo duol sa kabaybayonan sa lungsod sa Compostela mga alas 4:40 kagahapon sa hapon.
Sigun sa mga saksi nga daghan gyud nga mga lumolupyo nga ninggawas sa ilang mga balay aron pagtan-aw sa maong buhawi.
Kini tungod sa kadako nga gisundan sa kusog kaayong kilat.
“Daghan gyud ang mga tawo nga nigawas sa baybayon dili lang sa amoa hasta didtos sa Danao dapit.Inig kilat lagi adto gyud igo sa buhawi,”asoy ni Louie Reyes kinsa usa sa nakasaksi nga taga barangay Poblacion, Compostela.
Si SPO1 Lolito Oleverio, sakop sa Danao Police Station nga nahinabi sa Sun.Star Superbalita, niingon nga nga daghang mga tawo ang nagpundok sa ilang police station ilabi na sa ilang fish port aron lang pagsaksi sa buhawi.
“Dako kaayo, Sir uy. Malungag gung dagat. Unya kanang dakong punoan sa buli morag ingon ana gyud lagi,” asoy ni SPO1 Oleverio.
Gibana-bana nga nilanat ang mga talan-awon og 10 minutos una pa nawagtang.
Apan human kini nawala nisunod usab ang kusog kaayong kilat ug dugdog dungan na sa pagbunok sa uwan.
Si FO1 Roy Aramat sa Carmen Fire Department niingon nga wa sila makakita sa buwahi apan nakasinati silag kusog kaayong uwan sa maong mga oras.
Ang tinugyanan sa Pag-asa Mactan nga si Boy Artiega nga nahinabi sa Sun.Star Superbalita nipasabot nga ang nakitang buhawi kagahapon uwan nga nagpundok sa usa ka dapit sa panganod nga adunay hangin.
Hinungdan nga wa na makaagwanta sa kabug-aton, nahulog ang tubig nga natumong diha sa kadagatan sa Danao ug Compostela.
“Kay ang sakto gyud unta ana magkatag man na siya mao nang dunay uwan anang mga dapita.Pero kadto siya nagpundok lang sa usa ka lugar lang gyud mao na kon mahulog siya kusog nga morag malungag ang dagat nga naigo,”pasabot ni Artiega.
Apan nagkanayon si Artiega nga ang nakaayo nga nihagbong sa dagat ug wala matumong sa kabalayan nga posebling makahimog dakong kadaot.
“Kay kanang upat unya ang usa morag gidak-on og buli, dako na kaayo na siya,”dugang ni Artiega.