NAKABSAN sa kinabuhi ang usa ka amahan human nabangga ang gimanehong motorsiklo niadtong nilabayng adlaw sa lungsod sa Alubjid, Misamis Oriental.
Si PO2 Lester Seriales sa Alubijid Police Station niila sa namatay nga mao si Ely Almero Jara, 44, minyo, samtang kritikal ang kondisyon sa backrider nga asawang si Mayunda, 41, mga residente sa Barangay Sampatulog, susamang lungsod.
Sa pakighinabi sa Sun.Star SuperBalita ngadto kang PO2 Seriales, gibutyag niini nga gikan nagpatubil og gasolina ang magtiayon aron mopaingon ning siyudad sa Cagayan de Oro dihang pagtabok nasapon sa usa ka Rural Transit Mindanao Inc. (RTMI) bus nga adunay body number nga 125 gimaneho ni Lurimer Agid-Butes, 38, minyo, taga Macasandig ning siyudad.
Paingon unta ning siyudad ang mga biktima dihang aksidente nga nasapon sa RTMI hinungdan sa pagkabangga ug pagkalagpot sa mga biktima. Nagrabehan si Ely kinsa nabunal ang ulo sa semento nga gituouhang usa sa hinungdan sa iyang kamatayon.
Ang asawa nakaangkon og grabeng bun-og sa lawas niadtong tungora, human sa insidente dali nga gipangdala sa Northern Mindanao Medical Center (NMMC) ning siyudad apan si Ely nakabsan sa kinabuhi pipila ka oras ang nilabay sulod sa emergency room. Ang asawa padayon pang giatiman ning panahona sa mga doktor.
Matud ni Seriales nga detenado sa prisuhan ang driver kinsa natigayong pasakaan og kasong reckless imprudence resulting to homicide.
Nasunog
Samtang gidugang ni Seriales nga pipila sab ka oras gikan nagpatubil ang magtiayon sa tindahan nga namaligya og gasolina niulbo usab ang dakong sunog sa maong tindahan gikan sa naglinya nga mga botelya sa gasolina.
Ang maong tindahan gipanag-iyahan ni Santiago Pacamalan.
Walay nahiblin sa tindahan nga gibana-banang nagbilin lamang og danyos nga P1,500. Hinuon, walay naangol sa insidente.
Gituohang tungod sa gigamit nga lamparilya hinungdan sa sunog, labina nga brown out man sa dapit niadtong tungora. (Stephanie V. Berganio)