BLANKO gihapon ang kapolisan sa pag-ila sa mga suspetsado nga miluthang sa duha ka mga lalaki diin usa ang nakabsan sa kinabuhi niadtong Biyernes sa gabii sa Lapasan ning siyudad sa Cagayan de Oro.

Diha-diha nga namatay si Benjamin Alforque Cadano, 30, ulitawo, taga Sta-Cruz II, Lapasan ning siyudad human naigo ang ulo ug nitiwasik ang utok. Nilapos ang bala sa ilong diin nahitabo ang insidente niadtong Biyernes mga alas 7:30 sa gabii samtang ang biktima anaa nagtan-aw sa dulang kompyuter sa maong dapit.

Ang kapolisan sa Police Station 3 (PS3) sa Agora nga nahinabi sa Sun.Star SuperBalita niingon nga kadudahang mibalik na usab kining grupo sa vigilantes nga gituohang responsible sa pagpamusil sa biktima human nasutang sakop sa usa ka notoryos nga grupong Batman 357 ang biktima.

Gani, bag-o lang si Cadano nakagawas gikan sa City Jail sa Lumbia sa mga kasong pagpangawat.

Gibutyag sa mga nakasaksi nga nagsul-ob og bonnet ang mga suspek sakay sa kolor itom nga XRM motorsiklo ug walay plaka diin ang backrider nga anaa pa sakay sa motorsiklo maoy nipusil ni Cadano sa iyang ulo.

Human sa insidente dali dayon nga misibat ug wala na namatikdan labina nga nagkagubot na ang mga residente sa dapit.

Nahipos sa kapolisan ang usa ka basyo sa bala sa kalibre .45 nga maoy gigamit pagpusil.

Pipila ka oras ang nilabay gikan sa insidente lain lalaki na usab ang gipusil pagka-alas 11:00 sa gabii samtang nagtindog sa atubangan sa Ororama Megacenter, Lapasan ning siyudad.

Giila ang biktima nga mao si Alley Diansin, 34, adunay kapuyo, taga Agora, Lapasan, ning siyudad.

Gamit ang kalibre .45 naigo sa tiyan ug milahos sa likod sa biktima.

Sakay gihapon sa kolor itom nga motorsiklo ang suspetsadong niluthang niini.

Human sa pagpamusil, nakadagan pa ang biktima paingon sa puloy-anan ug nangayo og tabang sa kapuyo kinsa maoy nidali pagdala niini sa Northern Mindanao Medical Center.

Sa pagsulat ning balita, luwas na sa kritikal nga kahimtang ang biktima kinsa deretsong gidala sa operating room human sa insidente.

Padayon pa nga gisuta sa kapolisan unsay mga kalambigitan sa biktima sa motibong pagluthang niini. (Stephanie V. Berganio)