NAGHIKOT sa iyang liog ug wala nay kinabuhi nga nagbitay ang usa ka Dutch kon Netherland national dihang nadiskubre kagahapon mga alas 9:30 sa buntag sa Luyong Bonbon lungsod sa Opol, Misamis Oriental.

Giila ang biktima nga mao si Rulef Cammingra, 38, ulitawo, lumad nga taga nasod sa Netherland.

Usa ka personahe sa Scene of Crimes Operatives (SOCO) nibutyag sa Sun.Star SuperBalita nga nag-inusarang nanimuyo sa puloy-anan ang biktima sa lungsod sa Opol.

Namatikdan kini sa pipila ka mga bata nga nagdula sa baybayon nga bahin sa maong dapit nga nagbitay ang biktima sulod sa lawak hinungdan nga gisusi ug nakumpirmang naghikot sa iyang liog gamit ang pisi.

Niini, nangayo og tabang ang maong mga bata ug gitaho sa kapolisan sa Opol Police Station ug daling miresponde sa dapit.

Nadungog nga problemado sa kwarta ang biktima ug adunay personal nga away sa iyang pamilya.

Ang Soco nagtuo nga kadlawon pa kagahapon nihimo sa paghikog ang biktima labina nga wala pa kini nanimaho ug bag-o pa kaayo ang insidente.

Sa pagsulat ning balita, gihimo pa sa kapolisan ang pagkuha ug mga detalye kalabot sa insidente apan natigayong dalahon ang patayng lawas sa Bollozos funeral parlor. (Stephanie V. Berganio)