HAPSAY na ang trabaho nga paghiling sa mga kargamento sa Bureau of Customs karon. Kaniadto ang paghiling didto gihimo sa Aquarius Container Yard apan gibalhin na kini ngadto sa halapad nga espasyo sa compound sa BOC didto sa Sasa ning siyudad sa Davao.
Ang BOC-Davao, pinangulohan ni Abogado Nereo Castigador, nagpahamtang sa estrikto nga mga reglamento sa adwana sama sa pagpailawom sa mga reefer vans sa X-Ray.
Ang Department of Health naghatag og sertipikasyon nga ang BOC nagbatun og kahanas sa paghiling sa mga kargamento ug nagklaro nga ang X-Ray apparatus dili peligro sa panglawas sa katawhan nga namuyo duol sa port zone.
Ubos sa kahimtang karon, mga importers ug exporters nangalipay tungod kay wa na sila mahiagum sa daghang kuti ug labad sa ulo sama sa wa nila masabti nga mga bayranan.
Kaniadto, napugos sila sa pagbalhin ngadto sa dakbayan sa General Santos tungod kay wa na naka-uyon sa mga pamaagi sa paghiling sa ilang mga kargamento.
Apan namalik sila dinhi sa siyudad sa Davao human ang designated inspection area gibalhin ngadto sa BOC compound. Tungod sa pagbalhin, daghang mga trabahante ang nahatagan og trabaho.
Ang maayong binuhatan dinhi sa BOC wa misipyat sa panan-aw ni Customs Commissioner Morales mao nga iyang gigantihan ang buhatan dinhi sa adawana pinaagi sa pagpahimo og dako nga building.
Kun wa nay magsurang-surang, gilauman nga ang buhatan sa BOC sa dakbayan makatabang og dako sa Aquino Administration pinaagi sa dakong kantidad nga makolekta gikan sa mga buluhisan.