SI MAYOR Roel Paras sa lungsod sa Malalag, Davao del Sur maoy nangulo sa pagsikop sa tulo ka mga nasakpang kawatan didto sa Barangay Bagumbayan.
Si SPO2 Wendell Avila nag-ila sa mga suspek nga sila si Edgar Vibora, Rodel Navasca ug Armando Basalo Jr., pulos mga lumolupyo sa dakbayan sa Digos.
Mga alas 6 sa gabii, Hulyo 10, giingon sa kapulisan nga naglibot ang mayor sa iyang lungsod mao nga naaktuhan ang mga nasikop.
Wa makalusot ang tulo human nakuha sa ilang posisyon ang klase-klaseng matang sa mga grocery items, Nokia cellphones nga gipanag-iyahan ni Armando Basalo Jr., ug laing Miren cellphone model C1000 kinsa iya ni Rodel Navasca.
Gitataw sa mga otoridad nga gisulod sa mga suspek ang Golingay Convenience Store nga nahimutang didto sa Barangay Baybay sa lugar, dayon nisibat sakay sa Kia Pride nga kotse nagbaton sa plakang GRZ-889.
Apan si Paras nga nasayod sa nahitabo nangunay paggukod sa mga suspek, gitawagan dayon niya ang kapulisan pinaagi sa iyang cellphone.
Ang gikawatang tindahan gipanag-iyahan ni Lilia Daligdig, taga Times Beach, Matina, dakbayan sa Davao.
Gitanggong na sa kapulisan ang mga dinakpan samtang gihan-ay na ang kaso batok sa mga suspek. (Dondon Dinoy)