NAGHUGPONG na ang mga opisyal sa probinsya sa Davao del Sur bisan pa man og magkaatbang sa pulitika aron pakgangon ang pagkuyanap sa makamatay'ng dengue.
Karong buwana lang giingong duha na ka mga pasyente ang namatay ug gikabalak-ang madugangan pa ugaling di mahatagan og hinanaling solusyon.
Niadtong Biyernes, si Ruparan Barangay Kapitan Pedro Roa mismo ang nangunay pagkuyog sa iyang 30 ka mga lumolupyo ngadto sa City Health Office (CHO) aron ipahiling tungod kay gidudahan sila nga may sakit nga dengue tungod sa mga simtomas nga nakita kanila, sama sa way puas nga hilanat.
Si Dr. Milagros Sunga, CHO officer, nagbutyag nga kini maoy labing daghan sa mga natakbuyan sa sakit sa ubang mga kabarangayan sa matag adlaw.
Sigun sa CHO masayran ang resulta sa eksaminasyon tulo ka adlaw gikan nagsugod ang hilanat.
Sukad buwan sa Enero, 14 na ka mga pasyente sa dengue ang namatay, sagad kanila mga bata, samtang dul-an 700 na ang ihap sa mga nataptan sa maong sakit ug gitambalan sud sa balay tambalanan sa lalawigan.
Niadtong Miyerkules, gi-aprubahan sa Sangguniang Panlalawigan sa Davao del Sur, nga gipamunuan ni Vice Governor Arsenio Latasa, ang usa ka resolusyon nga nagdeklara sa probinsya ilawom sa State of Calamity.
Sayo niini gipangayo ni Governor Douglas Cagas ang deklarasyon aron nga makapaguwa dayon ang probinsyang kagamhanan og pundo alang sa mga biktima sa dengue.
Si Cagas ug Latasa kanhi hingpit nga magka-away sa pulitika, apan ning bag-o lang gipasalig ni Latasa ang iyang siyento porsyentong suporta sa administasyon sa gobernador.
Subay sa taho, kini na ang ikaduhang higayon nga gipailawom ang probinsya sa maong deklarasyon sukad niadtong 1980, human gipakanaog sab ang state of calamity tungod sa grabeng hulaw.
Gitakdang mohimo sab og lakang ang mga opisyal sa 337 ka mga barangay sa Davao del Sur aron masumpo ang pagkuyanap sa sakit sa ilang lugar.
Gawas sa dakbayan sa Digos, gibantayan na sab ang mga apektadong lugar sama sa lungsod sa Sta. Cruz ug Bansalan. (Dondon Dinoy)