WALO ka tawo ang naangol human nagsampok ang usa ka single nga motorsiklo ug pedikab didto sa National Highway, Barangay Apokon, dakbayan sa Tagum, Sabado sa kaadlawon.
Sumala sa report nga nakuha sa SuperBalita gikan sa Tagum City Police Station, nahitabo ang disgrasya pasado alas 3:00 sa kaadlawon.
Pareho nga nagsubay sa dalan ang usa ka Honda Wave nga motor nga gidryaban ni Danilo Arada ug usa ka Kawasaki nga dunay sidecar nga gidrayban ni Ramil Dedulay.
Apan pag-abot nila sa junction sa bag-ong city hall, nagsampok ang duha ka mga motorsiklo.
Tungod sa kakusog sa impak nangaangol ang mga sakay sa duha ka mga sakyanan human nabagnos sa dalan ug naparok.
Ang unom ka mga sakay sa pedikab lakip na ang drayber nga gidala sa opsital giila nga sila Jun-jun Ybanez; Diomedes Ebiota; ug Kim Tora, pulos molupyo sa Tipaz, Barangay Magugpo East, siyudad sa Tagum; Quenee Inso nga taga Barangay Apokon; ug si Melvin Villarito nga taga dakbayan sa Digos.
Samtang ang sakay sa single motor nga gidala sa ospital mao ang drayber nga si Arada ug ang iyang angkas nga si Reniel Bisagas 24, ug molupyo sa Purok 11, Barangay Sampao, lungsod sa Kapalong Davao del Norte.
Dugang imbistigasyon gihimo sa kapulisan sa aksidente. (Marvin Pineda)