ANG grupo sa Alkhobar Terror Group maoy gitudlo sa mga otoridad nga nagtanom og bomba sa siyudad sa Tacurong niadtong milabay nga adlaw.

Gibutyag ni Tacurong Chief of Police Superintendent Afredo Dangani nga gitug-an kanila sa tag-iya sa Noli Junkshop nga sa wala pa nila makaplagi ang usa ka Improvised Explosive Device nga gibutang ilawom sa Jetmatic Pump, nakadawat na sila og hulga gikan sa maong grupo kinsa nagbahad nga kun magmagahi sila sa paghatag og protection money mahiagum sila sa kabangis niini.

Nagpagawas sab dayon og direktiba si PNP-12 Regional Director Felicisimo Khu sa iyang mga provincial ug city directors sa tibuok rehiyon dose aron subling himuon ang random checkpoints sa matag lugar ug pakusgon ang implementasyon sa Barangay Defense System.

Namatikdan sa mga otoridad nga daku ang natabang sa mga checkpoints sa pagpakgang sa kriminalidad apil na ang visibility patrol sulod sa 24 oras.

Giawhag sab karon ni Khu ang katawhan sa Region 12 nga tabangan ang kapulisan sa pagbantay sa kahusay ug kalinaw pinaagi sa pagtaho sa unsa mang mga mamatikdang kadudahang butang nga posibleng dunay sulod nga bomba. (Edgardo Fuerzas)