Pagkasikop sa 29 ka tawo dakong kalampusan sa CIDG

ANG pagkasikop sa baynte-nuybe ka mga tawo ug pagkasakmit sa mokabat sa tunga sa milyon ka pesos nga kantidad sa shabu maoy usa ka labing dako nga kalampusan sa Oplan Big Berta sa Criminal Investigation and Detection Group (CIDG) Region 11.

Kini ang pamahayag ni CIDG 11 Director Generoso Bonifacio human nila gironda ang balay sa unom

ka mga tawo nga maoy subject sa search warrant nga gipaguwa ni Regional Trial Court Executive Judge Isaac Robillo Jr. niadtong Sabado.

"I would consider that the arrest of this suspected drug pushers, and the confiscation of many sachets of shabu is the biggest accomplishment we have this year," ni Bonifacio kinsa tulo pa lang ka bulan nga nahimong direktor sa CIDG 11.

Si Bonifacio maoy nangulo sa raiding team uban sa mga sakop sa Davao City Police (DCPO) dihang ilang giserbe ang search warrant sa alas 7:00 sa buntag didto sa Purok 3, Barangay 31-D Poblacion, siyudad sa Davao.

Sa maong ronda, nasikop sila Robelyn Remulta, alyas Bebeng, 28; Marcelita Adin, 33; Naima Butocan, alyas Butching, 24; Pidong Bandera, alyas Pidong, 57, minyo, sari-sari store owner; Amelita Bayabao, 25, asawa ni Samad; Salazar Bayabao, alyas Kusa, 23, minyo, pulos nagpuyo sa Purok 8, Barangay 31-D Poblacion, ning siyudad.

Samtang nagdinakpanay ang mga otoridad, nakaikyas si Samad Bayabao (bana ni Amelita) hinungdan nga gipangita siya karon sa mga sakop sa CIDG 11.

Ang silingan sa magtiayong Bayabao nga si Sarah Tausing, 34, minyo, gisikop sab sa kapulisan tungod kay naghupot siya og 16 ka pakete nga shabu mao nga giapil siya pagdemanda ngadto sa korte.

Nakuha gikan kang Remulta ang lima ka pakete sa shabu, walo kang Adin, duha kang Botocan, lima ka pakete ug tulo ka sako gikan kang Bandera, upat kang Amelita ug walo kang alyas Kusa.

"Nironda namin ang kanilang mga bahay matapos malaman namin galing sa aming informant na rampant talaga ang bintahan ng shabu naturang lugar," sulti ni Bonifacio dihang gihinabi sa Sun.Star Davao SuperBalita.

Si Bonifacio nagbutyag nga unom ka mga tawo ang tumong sa maong search warrant mao nga ilang gisusi ang balay sa mga suspetsado.

"Well, we confiscated many sachets of shabu and a cash amounting to P30,000. Hinukay pa namin ang buhangin dahil doon inilibing ng mga suspects mga ebidensiya," pahayag sa maong opisyal.

Sa pakighinabi sa SuperBalita sa mga dinakpan, ang uban kanila miangkon nga nahimo silang runner sa ilang mga higala nga namaligya og shabu tungod sa kalisud.

Si Amelita Bayabao (asawa ni Samad) nagbutyag nga wala siya namaligya og shabu sanglit ang iyang negosyo mao lang ang pagpamaligya og uling gikan sa Marilog ug iyang itumod didto sa Boulevard.

Ang tanang dinakpan gipailawom sa drug test ug ang mga ebidensiya gidala didto sa PNP Crime Laboratory niadtong Sabado sa hapon. (AD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph