USA ka breeder og manok igsasabong ang gipatay sa duha ka wa mailhing mga tawo sa alas 3:30 sa hapon niadtong Sabado didto sa Purok Anahaw, Barangay Buhangin, siyudad sa Davao.
Ang biktima mao si Allan Cuadrillero, 35, minyo, ug nagpuyo sa San Miguel, Dumanlas, Barangay Buhangin.
Si PO3 Florizil Villaren, duty investigator sa Buhangin Police Station, nagbutyag sa iyang spot report nga gipusil ang biktima samtang nakaparada ang iyang motorsiklo atubangan sa Immaculate Concepcion Chapel.
Matud ni Villaren nga dunay gikuha ang biktima sa "U Box" sa iyang motorsiklo nga dunay plate number IW-1364 apan kalit siyang giduol sa duha ka mga tawo nga nagsakay sab og motorsiklo.
Ang duha, suma sa imbestigasyon, wa maglangan og panahon ilang gipusil ang biktima sa duha ka higayon sa iyang tangkugo ug tiyan.
Si Cuadrillero, human sa pagpamusil, nahagba sa iyang nahimutangan ug giingon nga namatay siya dayon sigun sa mga sakop sa Scene of the Crime Operatives (Soco) 11.
Mga mamumuno daling mibiya sa maong dapit sakay sa usa ka motorsiklo nga way plate number paingon ngadto sa wa masayri nga lugar.
Nakuha sa mga otoridad ang duha ka baseyo sa bala sa .45 kalibre nga pistola nga maoy gigamit sa mga mamumuno.
Ang patay'ng lawas sa biktima atua karon gihaya sa Angel Funeral Homes samtang ang kapulisan naningkamot nga masayran ang motibo sa maong krimen.
Sa pagsuwat ning balita, gisusi sa SuperBalita ang Buhangin Police Station ug nasayran nga miadto na ang ilang opisyal sa crime scene aron palawman ang imbestigasyon aron sa inaong ilang mailhan ug masikop ang mga mamumuno. (Alger Dura)