SAMA sa gilauman, grabeng binumbohay sa mga kinumo ang nasaksihan sa panag-abot sa duha ka knockout artists apan pagkahuman sa binukbokay, nipatigbabaw si Puerto Rican Juan Manuel Lopez batok kang Filipino Bernabe Concepcion.

Si Lopez (29-0, 26KOs) miiskor og 2nd round TKO nga kadaugan batok kang Concepcion (28-4-1, 15KOs) aron depensaan ang iyang World Boxing Organization (WBO) featherweight title kagahapon sa Coliseo Jose Miguel Agrelot sa San Juan, Puerto Rico.

Sa sayong bahin sa first round, gipatumba dayon ni Lopez si Concepcion gamit ang iyang gikahadlukang wala nga kumo. Nakabarog man tuod si Concepcion apan tatawng rugi pa gyud kini.

Updates on President Benigno Aquino III's presidency

Sa hinapos nga bahin sa round, nakapanemaho na’g dakong kadaugan si Lopez ug iyang gipauwanan og maayo og mga makusog nga kumo si Concepcion. Sa wala damha, naigo si Lopez sa sagol pamahala nga tuong kumo ni Concepcion hinungdan nga natumba sab siya dayon mibagting.

Sa 2nd round, wala na gyud nikompiyansa si Lopez apan dihang nakakita na sab kini’g buslot sa depensa ni Concepcion gibuhian na sab niini ang iyang walang kumo nga nagpatumba og balik sa Pinoy.

Nakabarog ra gihapon pagbalik si Concepcion apan aron lang tiwasan ni Lopez hangtod nga natumba na sab pagbalik ang Pinoy. Bisan nga nagbaragbarag, mibarog gihapon si Concepcion apan ning higayuna, giundang na sa referee ang away.

“Sometimes you get a little overconfident and you have to calm down and fight under control, but he’s a great fighter, a strong fighter and has a good punch,” matod ni Lopez sa interbyu sa www.fanhouse.com. “I have to learn to never feel overconfident, even though I knocked him down and knock him out in the second round and I feel good about it.”

Ning maong promosyon nga giulohan og “The Challenge”, napreserba ni Nonito “The Filipino Flash” Donaire, Jr. (24-1, 16KOs) ang dungog sa Pilipinas pinaagi sa pagposte og 8th round knockout nga kadaugan batok kang Mexican Herman Marquez (27-2, 20KOs) aron depensaan ang iyang World Boxing Association (WBA) Interim super flyweight title.

Dominado gyud kaayo ni Donaire ang away gikan sa sinugdanan hangtod nga iyang gitumba si Marquez gamit ang iyang walang uppercut sa 8th round nga maoy naghuman sa away.

Ang ikatulong Pinoy nga miaway nga si Eden Sonsona (21-6, 7KOs) nahisugamak sa masakit nga 9th round knockout nga kapildihan batok kang Puerto Rican Jonathan Oquendo (19-2, 12KOs) sa ilang 10-round non-title bout.

Nag-una gyud unta si Sonsona sa scorecards apan human sa upat ka sunodsunod nga low blows ni Oquendo sa 7th ug 8th rounds, hayan nausab ang templada sa away.

Sa hinapos nga bahin sa 8th round, nataymingan si Sonsona sa makusog nga right straight ni Oquendo hinungdan nga natumba siya sa premirong higayon. Sa 9th round, mao ra gihapon nga kumo ang nagpatumba’g balik kang Sonsona ug wala na siya nakabarog ning higayuna.