SA miaging adlaw, gipahigayon sa Cebu City Waterfront Hotel and Casino ang oathtaking sa mga bag-ong ningpasar sa KBP accreditation examination - daghan nila mga batan-on. Kanilang tanan, congratulations!

Nahimo kitang magsisibya o magsusulat sa nagkalailain nga hinungdan, dunay aksidente lang, ang uban tungod kay mao kini ang ilang pangandoy. Apan ako nagtoo nga niining atong kalibutan ang tanan dili aksidente lamang. Ang tanang panghitabo dunay hinungdan.

Updates on President Benigno Aquino III's presidency

Tingali dunay uban kansang tuyo mao nga mahimo silang inila o popular. Ug dili ako bout nga mohukom nga sayop ang maong tuyo.

Apan ako moingon nga ang dugukan sa pagkamagsisibya o magsusulat wala nihunong dihang dapita. Incidental lang pagkasikat, dili kini ang esensya.

Ang lisod nga bahin mao ang mga higayon diin suwayan ang kalig-on sa imong kalag: sa imong pagpangoykoy sa mga mahinungdanong balita, tungod kay dili maayong balita kung wa kay balita; sa imong pag-istablisar og maayong relasyon sa imong news sources inubanan sa paglikay nga dili ka ma-attach, kay ang pagka-objective man ang marka sa tinood nga tigbalita; sa imong kahadlok nga ma-outscoop hilabi na kung ang imong editor nagtoo nga mahimo kang anaa sa tanang lugar sa samang higayon; sa imong pagdumili pagdawat sa envelope sa paagi nga dili ka tawgon nga 'nagmamalinis'; sa imong pakig-deal niadtong mga dugay na sa buhat nga nagtuo nga nakamao na sila sa tanan o niadtong bag-o pa sa industriya apan nagtuo nga mga beterano na sila; sa pag-atubang sa hulga sa imong kinabuhi sa higayon nga duna kay 'maligsan' nga dagkong tawo.

Ang nahitabong masaker sa mga tigbalita didto sa Maguindanao niaging tuig maoy buhing hulagway sa kakuyaw nga giatubang sa mga anaa sa industriya sa paghatod sa mga balita.

Sama sa tanang mga institusyon ning kalibutan, dili perpekto ang media. Mao nga matagkaron ug unya gikinahanglan kini nga makig-dayalogo - usbon ko, dayalogo ug dili transaksyon - sa mga naglainlain nga sektor hilabi na gayud sa gobyerno aron makab-ot ang unsa may ikaayo sa kinabag-an.

Ang publiko pabiling nagsandig sa media isip institusyon nga maoy tigbutyag sa kamatuoran. Apan gikinahanglan usab nga masabtan sa media nga walay bisan usa ka tawo o institusyon nga dunay monopoliya sa kamatuoran. Gani ginaingon man nga usahay sa kontrobersiya dunay tulo ka habig: ang imong habig, ang akong habig, ug ang sakto nga habig.

(birada_ruphil@yahoo.com)