DUHA ka adlaw nga gipundok ni Quito Obeso ang iyang mga taxi driver aron ipaubos sa seminar sa National Telecommunication Commission, Land Transportation Office (LTO) ug Cebu City Police Office (CCPO).

Nahitabo ni niadtong Hulyo 9 ug 10, diin tibuok adlaw nga naminaw og nisalmot sa diskusyon ang subra sa 600 ka drayber sa Spider, Scorpion og Airland taxi.

Updates on President Benigno Aquino III's presidency

Nagpasalamat ko kang Quito nga nihatag kanako og higayon nga makatambong duha ka adlaw nga kalihukan aron mapaambit ang akong tinguha nga mahulma ang usa ka kapunongan sa mga taxi driver, nga sa dugayng panahon akong gihandum nga mahatagan og katumanan. Serbisyo publiko lang gihapon sanglit sa subra sa 20 ka tuig nakong panibya kini ra man gyud nga bokasyon ang akong nakat-onan.

EDUKASYON

Ang National Telecommunications Commission (NTC) nilampos pagpasabot ngadto sa mga driver kong unsa ka importanti sa komunikasyon nga gitangkil diha sa ilang taxi unit pinaagi sa VHF og UHF radio. Di sab mahimo nga magsigi sila og 'over-over' kung di sila moagi og seminar sama sa gihimo sa taga NTC.

Giklaro sa NTC nga ang radio para ra gyud sa seryoso nga komonikasyon og dili sa pag gara gara sama niining gihimo sa mga jammer. Ang LTO sa iyang bahin seryusong mipalab-as sa mga taxi driver sa mga balaod sa karsada nga sagad nilang gilapas.

Samtang ang CCPO pinaagi kanila ni Sir Castronuevo, Garciano og Mam Cheryl Boniao nihatag og mga tips unsaon sa mga taxi driver nga makalihay sa posibling trahedya nga ilang mahiagoman sa mga kamot sa badlongon sa katilingban nga pagpakaaron ingnon nga ilang pasahero.

PAMUGAS

Sa akong bahin, akong gipasabot sa mga driver ang dakong bentaha nga ilang kapahimudsan kong mosanong sila sa akong panawagan nga maghugpong. Bisan kong magsugod lang og 20 ka buok, basta magkasabot lang pagkab-ot sa mga bataklang katuyo-an sa organisasyon. Mag-unsa man nang daghan kaayo apan di sab interesado ang mga miyembro.

Gikan sa usa ka kahugpongan, akong plano nga mahimo kini nga usa ka kooperatiba sa tinguha sab nako nga makapangita og paagi ang grupo nga madungagan ang ilang kinitaan pinaagi sa mga programa ug proyekto nga mahimong pasiugdahan sa grupo.

Pananglit ang plano pagpabarug sa labing una nga karenderiya alang sa mga taxi driver. Kini dumalahon og panag-iyahon sa mga taxi driver ra sab diin ang kinitaan mobalik ra sab sa ilang bulsa pag-abot sa panahon.

Gawas sa karenderiya, kining tindahan nga magbaligya sa mga produkto nga gikinahanglan sa driver og sa iyang pamilya sama sa bugas, sud-anon, de latang pagkaon, sabon og ubang kinahanglonon sa kusina. Apil na sab dinhi ang school supply sa mga anak sa taxi driver nga nag-eskwela. Dako ang akong pagtoo nga mahimo kini kay nahimo man sa uban nga nagpasakop og kooperatiba.