GIHANDOM kagahapon sa mga militanteng grupo ang 25 ka tuig nga anibersaryo sa pagkahanaw sa aktibistang pari nga si Fr. Rudy Romano.

Ang Task Force Detainees of the Philippines-Karapatan, Sanlakas, Bagong Alyansang Makabayan ug mga kaalyadong grupo nihalad og buwak ug nidagkot og kandila sa marker ni Romano sa dan Katipunan, barangay Tisa, siyudad sa Sugbo.

Updates on President Benigno Aquino III's presidency

Si Dennes Abarientos sa Karapatan nipasabot nga ang 26 ka mga kandila nga ilang giugbok maoy magtimaan sa 26 ka mga desaparecidos kun mga tawong kalit nga nahanaw.

Sa maong gidugayon, nagpabilin pa gihapon ang panawagan sa grupo nga mao ang hustisya alang kang Romano apil na sa ubang desaparecidos.

Si Romano nga usa ka Redemptorist priest, naila sa iyang pagka-human rights defender ug aktibong nangampanya alang sa kagawasan niadtong panahong diktadoriya ni Ferdinand Marcos.

Niadtong Hulyo 11, 1985, gituohang gidagit si Romano human kini kalit nga nahanaw.

Dunay mga saksi nga nagtumbok nga dunay mga armadong lalake ang nisignit sa usa ka tawo samtang nagbarog sa nahisgutang dan ug kini gituohang si Romano.

Sukad niadto, wa na igkita pa si Romano bisan ang iyang lawas kon kini gipatay man.

Isip paghandom usab kang Romano, ang parokya sa Redemptorist nibukas kagahapon sa ilang photo exhibit diin mga hulagway sa na-missing nga pari ang makita sa ganghaan sa simbahan.

Sa dayong hapon, nipahigayon usab og candle lighting ang mga militante nga grupo nga ilang pahinungod usab sa uban pang mga aktibista ug mga militanteng miyembro nga kalit usab nga nangahanaw tungod sa ilang pagtuo ug baroganan.