Nakabsan sa kinabuhi ang usa ka mag-uuma human gipusil og pugakhang sa iyang manghod sa umahan sa Sitio Tugok, Barangay Lipanto, lungsod sa Alegria niadtong Sabado sa butag.

Si Marcial Ybas, hingkod ang panuigon, ulitawo ug mag-uuma, namatay sud sa tambalanan sa Alegria kagahapon sa buntag.

Updates on President Benigno Aquino III's presidency

Samtang ang suspek nga manghod nga si Vicente 38, minyo ug mag-uuma, nagtingkagol karon sa prisohan samtang nagpaabot sa tukmang kaso nga ipasaka batok kaniya.

SPO1 Renato Abellar, imbestigador sa Alegria police station nga nahinabi sa Sun.Star Superbalita, nagkanayon nga niadtong Sabado sa alas 10 sa buntag, nagkalalis ang managsuong mag-uuma sa ilang umahan.

Giingong ang suspetsado mananom unta mga lagutmon ug mais sa yuta nga kabilin sa ilahang mga ginikanan apan gibadlong sa iyang maguwang nga dili magbuotbuot sa pagpananom kay komon ang luna ug gikinahanglang mananghid sa kadaghanan sa ilang mga igsuon.

Mao kini snugdanan sa ilang panaglalis. Nipauli ang manghud nga si Vicente, apan giingong nakainom ang biktimang si Marcial nga nanulong sa panimalay niini nga niresulta sa ilang panaglalis og balik.

Matud ni SPO1 Abellar, nasayran sa ilang imbestigasyon nga ang biktima nisinggit: "kilawon ku nang imong atay ug buhing apdo."

Kini uban sa pagkuhag bato ug gihapak ang iyang manghud nga suspetsado hinungdan nga nisulod kini sa ilang balay ug nikuhag pugakhang ug gipusil ang iyang maguwang.

Human sa pagpusil natumba ang biktima, gitiwasan kinig bunal sa ulo sa gidala niining pugakhan apan nakahimo pa kini sa pagdagan bisan paman kun natusak-tusak na ang iyahang kalawasan sa bala sa pugakhang.

Dihang nakadagan ang biktimang si Marcial, ang suspetsadong manghod nga si Vicente boluntaryong nitahan sa kapulisan niadtong Sabado sa udto uban sa iyang ig-agaw nga barangay tanod.

Ang kapulisan sa Alegria nga nirespondi sa alarma ug inabagan sa mga residenti sa dapit, ilang nakit-an ang biktima mga 50 metros ang gilay-on sa balay sa suspetsado nga nipasok kini sa ilawom sa kakahuyan ug kawayanan duol sa pangpang.

"Buhi pa pag-abot sa among mga kaubang pulis nipasok siya sa libon sa kahadlok nga usban pa sa iyang manghud sa pagpusil…nanimahong bino hinungdan nga giyayungan sa mga residenti sa lugar ug mga police aron madali sa hospital," sumala pa ni SPO1 Abellar.

Apan kagahapon sa buntag nakabsan sa iyang kinabuhi human usab walay mga kabanay niini ang ni-abag didto sa tambalanan.

Atol sa pagkuha ning taho, gipaabot sa kapulisan ang kabanay sa pagduso og reklamo batok sa suspek.

Gipaabot usab nila ang reglamentary period una buhian kon way moreklamo, apan ila nga ikonsulta sa piskaliya sanglit duna man kiniy amas uban sa iyang pagtahan.