MAO na ba kaha kini ang sulosyon aron maundang ang pagpang-ihaw sa mga "tinuod" nga mga journalist sa nasod.
Ang presidential task force on political violence, nga gitukod ni kanhi Presidenti Arroyo, gipalig-on karon ni Presidenti Aquino pinaagi sa pagtukod og "super body" nga maoy motutok niining pagpangataki sa mga journalist.
Pero, atong hinumdoman, kining super body gitukod lamang kini aron paggukod niadtong mga responsabli o mastermind sa pagpatay sa mga tigbalita - dili kini garantiya nga maundang o mahunong ang kremin batok sa mga journalist sa nasod.
Ang preventive measure nga maggikan mismo sa mga journalist ug sa gobiyerno mao ang labing important sa tanan aron wala nay kinabuhi nga mahanaw.
Ang batakang lagda sa "tinuod" nga journalist mao ang pagpadayag sa mas balansi, matinud-anon, ug makiangayon nga report, impormasyon o komentaryo. Kon wala kini, segurado maapeke gyud ang tigbalita.
Panahon na tingali ipagawas sa mga lehitimong grupo sa media ang tinuod nga mga hinungdan o ugat nganong duna mga sakop sa media nga gipang-ihaw. Unsa ba gyud ang pagkatawo, estelo sa trabaho o background niining mga biktima?
Kon patas ang presentasyon ug gibasi sa tinuod nga panghitabo, motuo ba mo nga mabutang sa peligro ang usa ka tigbalita.
Ang numero unong motibo sa pag-ihaw sa mediaman mao ang pagpahunong pagyagyag sa impormasyon ngadto sa publiko. Ang tinuod nga mediaman mobutyag sa kahiwian apan maminaw usab og katarungan sa gipasanginlan.
Pero, ang papel sa gobiyerno maoy labing importanti aron kaminusan kon dili man maundang, kining pagpamatay sa journalist. Unsaon?
Ipadayon nato pagpuhag sa mga private armies, sobsob nga kampaniya batok sa illegal nga mga armas, gukdon ang mga kurakot sa gobiyerno, puhagon ang mga illegal nga kalihukan sama sa sugal, illegal logging, illegal quarrying ug kini tanang sindikato sa drugas, peke nga mga kwarta, smuggling, pagpangilkil ug ang tanang illegal nga kalihukan sa mga establisemento sama sa night club, bar ug uban pang balay kalingawan.
Ang mga tawo nga nagpaluyo niini mga kalihukan maka-afford pag-ihaw og journalist, maka-afford sab pagpahilum pinaagi sa ilang bahandi.