DUHA ka mga insidente sa pagpanigbas ang natigayon niadtong Domingo sa managlahing dapit nga miresulta sa paglanding sa mga biktima sa Northern Mindanao Medical Center (NMMC) ning siyudad sa Cagayan de Oro.

Unang biktima mao si Eden Belasainin, 42, minyo, taga Crossing Balubal, ning siyudad.

Gisaysay sa biktima nga kalit lang siya nga giduolan sa supetsadong naila lamang sa ngalan nga Demmy ug deretsong gitigbas gamit ang sundang.

Sa ulo unta moderetso ang sundang apan nakalikay ang biktima hinungdan sa pagkaigo sa iyang bukton ug pagkaabis niini.

Wala gikabutyag ang hinungdan sa pagpanigbas kinsa ang suspetsado daling misibat human sa insidente niadtong Domingo mga alas 9:20 sa gabii.

Gidali usab pagdala sa NMMC ang biktima human sa insidente tungod sa dakong samad nga naangkon. Hinuon luwas na sa makuyaw'ng kahimtang ning panahona.

Samtang samaran usab asi Algie Jaramillo, 26, ulitawo, taga Poblacion, lungsod sa Laguindingan, Misamis Oriental.

Nahitabo ang insidente niadtong Domingo mga alas 9:00 sa gabii samtang nag-inom ang biktima kuyog ang bag-o lamang naila nga mga lalaki.

Apan dihang hubog na kalit lang nga nag-unay ang iyang mga kainom nga miresulta sa pagsukamagay. Niini gibadlong sa biktima ang kagubot apan siya ang kalit lang nga gitigbas.

Samaran ang biktima sa iyang likod nga bahin kinsa daling gidala sa NMMC ning siyudad.

Nakasibat gihapon ang suspetsado nga wala maila ang pangalan dihang giresponde sa kapolisan sa Laguindingan Police Station. (SVB)